Publiká riba 09 Febrüari 2026
WILLEMSTAD, – Djaweps último, Minister di Hustisia, mr. Shalten Hato, a duna inisio na un trayekto importante pa reorganisá e strukturanan salarial den Ministerio di Hustisia, spesífikamente pa tur e personal uniformá ku ta keda bou di e ministerio.
Durante un enkuentro di orientashon, Minister Hato a invitá representantenan di diferente kuerponan uniformá, inkluí Kuerpo Polisial Kòrsou, Brandweer Kòrsou, Sentro di Detenshon i Korekshon Kòrsou (SDKK), Duana, VDC, Curmil i tambe Wardakosta. Tur direktor di e diferente kuerponan aki a reuní pa diskutí e nesesidat di un mihó struktura salarial i pa drecha e situashon aktual di salarionan di e personal uniformá. Kada un di e diferente instansianan invitá, tin nan propio struktura salarial abase di nan spesialismo i esaki ta hasi e trayekto unu kompleho. Den vários di e kuerponan, rango ta kana paralelo ku salario, pero por ehèmpel na Servisio di Inteligensia (VDC) esaki ta diferente tambe a base di ekspertisio di e personal den e organisashon.
E inisio di e trayekto aki ta bini for di un realidat ku ya tin hopi aña: e bezoldiging aktual ta basa riba un sistema di salario ku ta data for di 1998, tempu di Antia Hulandes. E struktura salarial aki a pasa sin modifikashon signifikativo na momento di e transishon pa pais Kòrsou na 10 di òktober 2010, kual no ta aliniá ku e realidat ekonómiko i profeshonal di aktualidat.
Mas ainda, durante e añanan ku a transkurí, algun kuerpo uniformá a haña indeksashon i otronan nò, pero a apesar di esaki, e salarionan a keda basa riba montantenan bieu, loke a krea un diskrepansia entre responsabilidat, riesgo i kompensashon. Esaki ta pone un preshon enorme pa hasi e profeshonnan uniformá aki atraktivo i ta nifiká un preshon tambe riba e kapasidat pa retené i atraé personal kalifiká.
Den marko di e trayekto, Deloitte a keda presentá komo kònsultent independiente pa kompañá e proseso. Durante nan presentashon, Deloitte a indiká ku un struktura salarial unifiká, unda tur e diferente kuerponan uniformá ta forma parti di un solo sistema, lo ta ideal pa futuro. Segun Deloitte su investigashon, un struktura lo por promové mas mobilidat entre ámtenarnan, hasi e sektornan uniformá mas atraktivo i permití ku un ámtenar por move mas fásil di un kuerpo uniformá pa otro, sin pèrdè perspektiva di karera ni progreso salarial.
Aktualmente e sistema di salario pa personal uniformá por wòrdu deskribí komo antikuá, poko atraktivo i atrasá, spesialmente ora ku ta kompará ku otro islanan ku anteriormente tabata forma parti di Antia Hulandes. Esaki ta un reto serio pa e kontinuidat i pa fortalesa e kuerponan ku ta enkargá ku seguridat, lei i órden den nos komunidat.
Minister di Hustisia, mr. Shalten Hato, a suprayá ku e trayekto di reorganisashon di salarionan no ta un proseso di un solo dia, pero sí un paso nesesario i stratégiko pa invertí den e hende nan ku tur dia ta traha pa protehá e pais. Segun e minister, un struktura salarial moderno, hustu i atraktivo ta esensial pa garantisá un sistema di hustisia fuerte, profeshonal i sostenibel pa futuro.
E trayekto lo sigui ku mas análisis, diálogo ku e kuerponan involukrá i reunion individual pa yega na rekomendashonnan konkreto pa un solushon struktural pa tur personal uniformá den Gobièrnu di Kòrsou.
[FIN DI KOMUNIKADO]
