Publiká riba 10 Yüni 2025
WILLEMSTAD, – Minister di Hustisia, Shalten Hato, a konfirmá ku e ministerio ta kontinuá ku e proyekto ya inisiá di Polis di Bario den Kuerpo Polisial di Kòrsou. Awor ku Gabinete Pisas III a huramentá ayera, mesora e Minister a kontinuá ku proyektonan ku ya tabata kanando. E proyekto aki tabata konosí ántes bou di nòmber Regisor di Bario, pero despues di evaluashon i adaptashon di e ròl den komunidat, a tuma lugá un rebranding ofisial, ku awor ta uza e nòmber Polis di Bario.
E konsepto di Polis di Bario ta diferente for di e modelo anterior. Polis di Bario ta un hende uniformá, den su kapasidat aktivo komo miembro di Kuerpo Polisial di Kòrsou, ku ta traha den un bario spesífiko. E ta sirbi komo punto di kontakto pa komunidat, ta tuma aktivamente parti den tópikonan i asuntunan lokal ku ta pasa den e barionan, i ta ataká problema struktural i preventivo riba diferente aspekto, tambe ta atendé vários problema sosial, prinsipalmente lokual ta afektá e bario na su totalidat. E polis di bario ta identifiká su mes semper i ta parti di un presensia kontinuo den e bario, unda tambe e polis ta traha riba relashon di konfiansa, i duna atenshon na tema manera seguridat, kriminalidat bou di hóbennan, abuso di supstansia prohibí den bario manera e.o. droga i “lachgas”, i otro tópiko ku ta relevante pa tur grupo den bario.
Minister Hato a indiká ku e paso pa fortalesé Polis di Bario ta un parti importante di un strategia mas grandi pa mehora seguridat i restorá konfiansa entre pueblo i polis. “Polis di Bario no ta simplemente un kambio di nòmber. E ta reflehá un enfoke nobo, un manera di traha mas serka di e pueblo, ku enfoke riba solushon di problema i prevenshon,” segun Minister Hato.
Despues di un presentashon ku a hasi na e grupo di polisnan aki relashoná ku e “rebranding” i e nòmber nobo, pronto lo inisiá un kampaña di konsientisashon pa informá i lansa Polis di Bario na públiko. E kampaña lo sirbi pa introdusí e polis asigná na kada bario, klarifiká su ròl, i duna espasio pa komunidat pone su pregunta i ekspresá preokupashon. Ministerio di Hustisia ta invitá tur siudadano pa kolaborá ku Polis di Bario i kontribuí na seguridat i bienestar di nos bario.
