Minister di Hustisia ta lansa Sentro di Akshon Kòrsou - Informashon tokante Gobièrnu di Kòrsou

Notisia

Ministerio konserní Hustisia
 

Minister di Hustisia ta lansa Sentro di Akshon Kòrsou

Publiká riba 06 Mart 2018

Den kuadro di e esfuersonan pa kombatí kriminalidat en general i importashon di arma di kandela i otro tipo di akshon i komportashon ilegal ku ta relashoná ku esaki, djamars 6 di mart último, minister Quincy Girigorie a hasi apertura di e Sentro di Akshon Kòrsou (Actiecentrum Ondermijning Curaçao). Na e apertura aki tur e hefenan di departamentu di e kadena hudisial ku lo bai forma parti di e sentro aki tabata presente. Durante di e apertura Minister Girigorie a duna un presentashon amplio tokante e motibu pa kual a yega na lantamentu di e Sentro di Akshon Kòrsou, meta di e sentro aki i e forma ku e lo bai funshoná. Minister di Finansa señor Gijsbertha bou di ken Duana ta resortá tambe tabata presente i a ekspresá palabranan di elogio pa ku e gran logro aki.

Taskforce Vuurwapen
Represhon ta un di e pilánan prinsipal den maneho di e Minister di Hustisia aktual. Pa e motibu aki durante e periodo di gobernashon aki, e titular di Hustisia, lo enfoká riba atendementu ku kriminalidat na un forma integral i kordiná. Den kuadro di esaki na 2017 a kuminsá ku Taskforce Vuurwapen ku tabatin komo meta pa kombiná esfuerso di tur partner di Mantenshon di Orden Públiko den kadena hudisial pa asina baha e kantidat i uso di armanan ilegal riba nos isla. E trabou di e Taskforce aki a duna bon resultado, i a guia na lantamentu di un sentro di akshon, pa trabou konhunto i interkambio di informashon por tuma lugá na un forma konkreto i efektivo.

Partnernan den kadena hudisial
Den e Sentro di Akshon Kòrsou, lo tin kordinashon intensivo entre kuater pilá den Hustisia, ku ta informashon (informatie), investigashon (opsporing), mantenshon di órden i lei (rechtshandhaving) i maneho di Minister di Hustisia (bestuurlijk beleid). E organisashonnan di Hustisia ku lo forma parti di Sentro di Akshon Kòrsou ta: Kuerpo Polisial di Kòrsou, Afpakteam, Interpol, VDC, Wardakosta, Servisio di Impuesto, Ministerio Públiko, Kmar (Koninklijke Marechaussee), Marina Real (Defensie), RST (Recherche Samenwerkingsteam) i Duana (Douane). Nan lo traha huntu riba atendementu ku e problemátika rondó di 5 tema esta: arma di kandela, droga, likidashon, trafikashon di hende i formamentu di ‘gang’.

Koperashon di komunidat
Sentro di Akshon Kòrsou tin komo meta pa frustra intentonan kriminal na Kòrsou i evitá ku krímen organisá ta sigui penetrá den nos komunidat. Komunidat di Kòrsou lo bai kuminsá ripará un forma diferente di atendé ku krímen. Un di e faktornan pa bon resultado di e trabounan ku e Sentro di Akshon Kòrsou ta bai ehersé, ta informashon. E informashon ku komunidat ta dispone di dje ta krusial pa logra gara esnan ku ta kometé aktonan kriminal. Durante di e lansamentu di e sentro, minister Quincy Girigorie, a enfatisá importansia di dunamentu di informashon i mèldu serka outoridatnan konserní ora ku kualke siudadano tuma nota di algu ilegal ku ta tuma lugá i ku por peligrá seguridat di e komunidat. Di akuerdo ku minister Girigorie, Sentro di Akshon Kòrsou ta un stap firme den direkshon di un Kòrsou mas sigur.