Minister di Hustisia ta splika proseso pa nombra notario - Informashon tokante Gobièrnu di Kòrsou Bo opinion

Notisia

Minister di Hustisia ta splika proseso pa nombra notario

Geplaatst op 14 June 2018 dor di Ministerio Hustisia

Minister di Hustisia Quincy Girigorie a tuma nota di un komentario den medionan di komunikashon tokante un supuesto desishon ku Gabinete Rhuggenaath lo a tuma pa nombra dos notario Hulandes Europeo den kuadro di puestonan vigente pa notarionan na Kòrsou. E komentario aki ta duna motibu pa splika e proseso.
Na promé lugá e proseso pa nombra notarionan ta kai bou di responsabilidat di Minister di Hustisia. E proseso ta enserá ku despues ku notarionan solisitá, Korte Komun di Hustisia ta skucha nan. Seguidamente, Korte ta hasi un proposishon na Minister di Hustisia, indikando kua kandidatonan e ta konsiderá mihó ekipá pa okupá e puestonan vigente. E proposishon ta enserá vários kandidato pa kada puesto, for di kua e Minister por skohe. E proposishon no ta definitivo (‘bindend’) i komo tal, e Minister tin sierto libertat pa tuma e desishon ku e ta konsiderá mihó i e ta karga responsabilidat gubernamental pa e desishon aki.
Aktualmente tin 3 puesto vakante pa notarionan na Kòrsou. Den kuadro di esaki Minister di Hustisia entretantu a risibí e proposishon di Korte di Hustisia, sinembargo Minister no a risibí tur dokumento konserní i komo tal no a tuma desishon final riba nombramentu di notarionan.
Den kuadro di un prosedura adekuá Minister Girigorie ta enfatisá ku lo e no duna mas informashon riba e tema aki promé ku e tuma un desishon final i a informá e personanan konserní tokante esaki. Den e kaso aki minister ta tene na kuenta tur interes relashoná ku e desishon aki i e privasidat di e personanan embolbí. E último aki sigur teniendo kuenta ku nos komunidat ta chikitu i tur hende konosé otro. Ekspreshonnan tendensioso ku por saka e tema for di konteksto ta iresponsabel i Minister ta konsiderá esaki hopi lamentabel.

Ministerio konserní