Publiká riba 19 Yüni 2018
Resientemente a sali den publisidat un kaso kaminda Servisio di Atmishon i Ekspulshon Kòrsou (Toelatingsorganisatie – TO) a ninga pèrmit di estadia di un hóben menor di edat na Kòrsou. E argumento prinsipal den e kaso aki tabata e eksigensia di LTU (Landsverordening Toelating en Uitzetting) ku tur persona ku entregá un petishon pa pèrmit di estadia, mester warda e desishon riba esaki den eksterior òf mester tin un otro base di estadia bálido pa warda esaki na Kòrsou. Den kaso di e hóben menor di edat aki, e hóben a surpasá su periodo di estadia legal i komo tal outomátikamente TO a ningá e petishon.
Seguidamente, representante legal di e hóben en kuestion a entregá un karta di opheshon na nòmber di e hóben i djabièrnè 15 di yüni último esaki a wòrdu notifiká di e desishon positivo di Minister riba su opheshon. T’asina ku den e kaso konkreto aki un faktor relevante ta, ku e hóben su mama, kende ta kasá ku un siudadano di Kòrsou ku nashonalidat hulandes, sí tabatin e derechi pa warda riba su pèrmit di estadia na Kòrsou. Eventualmente e mama a risibí su pèrmit di estadia tambe.
Komo ku e yu menor di edat en kuestion ta kompletamente dependiente pa su kuido di e mayor ku a kasa ku e siudadano yu di Kòrsou i a entregá e hóben su petishon di pèrmit na momentu ku ainda e tabata legal, Minister di Hustisia a opta pa laga e mesun derecho ku e mama tin (esta e derechi di warda riba kontesta di su pèrmit na Kòrsou) konta tambe pa e yu. Den e kaso aki seguidamente, mirando ku ta kumpli ku tur sobra eksigensianan, entretantu a otorgá pèrmit na e hóben.
Orientashon Seksual
Ta importante pa splika, ku orientashon seksual di e mama di e mucha en kuestion no ta di ningun relevansia pa e desishon di Minister di Hustisia. Intentonan di kualke organisashon òf persona pa relatá e desishon aki na orientashon seksual di e mayor en kuestion, ta simplemente maluso di e situashon i ta un prueba ku bienestar di e mucha no ta pará sentral pa e organisashon òf persona aki.
