Publiká riba 28 Mei 2023
WILLEMSTAD – Resientemente Minister di Rechtsbescherming sr. Franc Weerwind for di Hulanda i Minister di Hustisia sr. Shalten Hato, huntu ku demas kolaboradónan di Hulanda i Kòrsou a hasi un bishita di trabou na Sentro di Detenshon i Korekshon Kòrsou (SDKK).
Meta di e bishita akí tabata pa sera konosí ku e tim di maneho di SDKK i tambe haña un bista di e desaroyo- i retonan ku tin den e instituto. Tur esaki ta den kuadro di e kombersashonan ku tin aktualmente na nivel di Reino Hulandes pa yega na un prizòn nobo.
Na e okashon akí direktor interino di prizòn sr. Richenald Ricardo a duna un presentashon visual kaminda ta ilustrá e diferente problema i retonan ku tin pa ku e infrastrukturá bieu di e prizòn i tambe e desafionan pa ku seguridat i e programa di resosialisashon. Tur esaki ta basá for di rapòrtnan trahá dor di diferente organisashonnan ku ta sali na defensa i derechi di detenidonan i komunidat.
Despues di e presentashon a tuma lugá un rekorido den e instituto kaminda por a bishitá algun blòk ku for di aña 2000 nunka no a haña renovashon. Tambe a pasa na e parti di Vocational Building kaminda gran parti di e programanan di resosialisashon ta tuma lugá. Aki tabatin e oportunidat di por a hiba kombersashon ku algun kliente di SDKK. Finalmente e delegashon a bishitá e área di indokumentadonan, esta Vreemdeling Opvang en Detentie Curaçao (VODC).
Ministerio di Hustisia i Gerensia di SDKK por wak bèk riba un bishita hopi positivo i eksitoso, ku e speransa ku pronto Kòrsou lo por haña un prizòn nobo.
