Publiká riba 12 Febrüari 2020
Willemstad – Minister di Finansa, sr. Kenneth Gijsbertha, den kuadro di restrukturashon i optimalisashon di e sektor di guèmbel di Kòrsou, riba invitashon di Gaming Control Board a bishitá ICE LONDON di 3 te ku 6 di febrüari 2020. ICE LONDON ta e konferensia i eksposishon di mas grandi riba tereno di guèmbelmentu. E mas ku 35.000 bishitantenan na ICE LONDON por hasi uso di e plataforma aki pa deskubrí inovashonnan di mas nobo relatá ku guèmbelmentu den tur sektor. Ku mas ku 9000 operadó den guèmbelmentu i mas ku 150 pais representá den e eksposishon, e eksposishon aki ta ofresé un plataforma mundial inigualabel pa bo sera relashonnan nobo den e mundu di guèmbelmentu.
Riba pòrtrèt: Minister Gijsbertha i e delegashon di Kòrsou durante ICE LONDON.
ICE LONDON ta ofresé huntu ku ICE VOX tambe posibilidat pa treinen na abundansia. Via di e ‘International Legislator’s Agenda’ e delegashon di Kòrsou por a netwerk i interkambiá pensamentu ku desaroyadonan di maneho, legisladornan i supervisornan di otro pais.
Minister Gijsbertha dia 15 di febrüari 2019 a nombra Gaming Control Board komo e supervisadó riba tur guèmbelmentu pa loke ta konserní kumplimentu i obedesementu di e ‘Landsverordering Melding Ongebruikelijke Transacties’ i e ‘Landsverordening Identificatie bij Dienstverlening’. E supervishon riba kumplimentu ku e ‘Landsverordening Buitengaatse Hazardspelen’ i e outoridat pa duna pèrmit tambe den korto tempu lo bai kai bou di enkargo di Gaming Control Board.
Na novèmber 2019 Foro Mundial di Organisashon pa Koperashon Ekonómiko i Desaroyo (OECD) a klasifiká Kòrsou komo “Largely Compliant” komo ku e ta kumpli ku normanan internashonal di transparensia i interkambio di informashon pa propósito fiskal. Tambe e sistema teritorial implementá dor di Minister Gijsbertha entrante 1 di yanüari 2020 i aprobá dor di Union Europeo i OECD pa loke ta konserní impuesto riba ganashi ta trese kuné oportunidat ekonómiko pa Kòrsou awor ku tambe stakeholdernan den e industria internashonal di guèmbel ku establesé nan mes ku un presensia real na Kòrsou i den un grado sufisiente pèrkurá pa kupo di trabou na personanan lokal i invertí den supstansia, lo por hasi uso di eksklushon for di ganashi pafó di Kòrsou for di impuesto riba ganashi.
Minister Gijsbertha: ‘Mester modernisá e sektor i maneho di guèmbelmentu pa asina tur hende ku ke hasi uso di dje tantu lokal i via di internèt lo por hasi esaki via di un operador legal i konfiabel. E kombinashon di reglanan adekuá, transparensia i e sistema teritorial i supstansia, ta ofresé oportunidat enorme pa Kòrsou por desaroyá e sektor aki komo un pilar ekonómiko importante.
E propósito di Minister Gijsbertha ta pa realisá regulashon integral di supervishon riba e sektor di guèmbelmentu den i for di Kòrsou di un forma progresivo pa protekshon di e guèmbeldó i e operador legal i pa prepará Kòrsou mas pronto posibel pa e Mutual Evaluation 2022 di Caribbean Financial Action Task Force (CFATF). Ademas mehorashon di regulashon di e sektor di guèmbelmentu lo posishoná Kòrsou internashonalmente komo un hurisdikshon konfiabel i transparente ku lo resultá den kresementu ekonómiko den forma di kupo di trabou direkto i indirekto, supstansia lokal i promové generashon di divisa.
