Minister Girigorie a lansa sistema integrá di KPC i INTERPOL - Informashon tokante Gobièrnu di Kòrsou Bo opinion

Notisia

Minister Girigorie a lansa sistema integrá di KPC i INTERPOL

Geplaatst op 17 November 2017 dor di Ministerio Hustisia

Durante di un enkuentro ku prensa djaweps 16 di novèmber Minister di Hustisia señor Quincy Girigorie a lansa e sistema di integrashon di datonan na frontera di Kòrsou. Ta trata aki di integrashon di e Border Management System di Kuerpo Polisial Kòrsou (KPC) i e banko di dato di dokumentonan di biahe pèrdí i/òf hòrtá (Stolen and/or Lost Travel Documents database – SLTD) di INTERPOL. Pa konkretisá e integrashon, Hefe di KPC señor Mauricio Sambo i hefe suplente di Interpol señor Prisco Francisca a firma un Memorandum Of Understanding (MOU). Di e forma aki e dos organisashonnan hudisial a hasi un palabrashon pa asina KPC por hasi uso di e informashon riba e ret di INTERPOL.

SLTD
A krea e banko di dato di SLTD na aña 2002 despues di e atakenan terorista di 11 di sèptèmber 2001 na Merka. A hasi esaki ku e intenshon pa yuda paisnan miembro di INTERPOL pa sigurá nan frontera i protehá nan siudadanonan kontra teroristanan i otro kriminalnan peligroso usando dokumentonan di biahe falsifiká. Pues e sistema di SLTD di INTERPOL por detektá pasportnan pèrdí òf hòrtá. Na momentu ku un persona yega na un puerto di Kòrsou, e funshonario di migrashon lo hasi un chekeo usando entre otro e datonan di e SLTD. 176 pais na mundu ta kontribuí na e banko di dato ku ta kontené mas ku 68 mion rekòr. Di yanüari pa sèptèmber 2017 paisnan a konsultá e sistema aki 1,243,000,000 bia i na e momentu ei a detektá mas di 115,000 kaso. Na Kòrsou no solamente imigrashon, pero tambe Infodesk di KPC lo por hasi uso di informashon ku e SLTD ta suministrá.

Logro
Ku esaki Kòrsou a alkansá un logro importante den desaroyo di maneho di seguridat nashonal. E integrashon ta hiba na un mihó kòntròl na i protekshon di e fronteranan di Kòrsou. Loke por sierto ta un aporte grandi pa por kumpli ku e rekisitonan nesesario, di moda ku aeropuerto di Kòrsou por klasifiká komo un aeropuerto di kategoria 1. Ademas e SLTD ta un instrumento perfekto ku ta kontribuí na kombatí terorismo, evitá entrada di kriminalnan peligroso i stòp personanan ku ke drenta pais di forma ilegal ku un pasport falsifiká.

Maneho
E trayekto pa yega na e integrashon aki ta parti di e maneho di Minister Girigorie enfoká riba prevenshon di krímen, kombatimentu di trafikashon di hende i trabou konhunto entre partnernan den kadena hudisial. Segun señor Girigorie, Kòrsou por ta orguyoso di ta un di e paisnan konektá riba e sistema aki. Minister Girigorie ta aploudí e esfuersonan di INTERPOL, KPC, Stichting Beheer ICT Rechtshandhavin, Automation Consultancy & Technological Systems (ACTS) i Core pa yega na e logro aki.

Ministerio konserní