Publiká riba 10 Yanüari 2020
Willemstad- Djaweps dia 09 di yanüari último, Minister di Desaroyo Ekonómiko, sra. Giselle Mc. William a risibí embahador di India na Den Haag, Honorabel Sr. Venu Rajamony. Durante e bishita aki, sr. Rajamony a mustra interes konkreto di parti di empresarionan di India pa hasi negoshi na i via Kòrsou i a identifiká oportunidatnan konkreto pa invershon for di India.
E embahador ta riba un bishita di trabou na Kòrsou pa eksplorá e merkado i trese e mensahe ku kompanianan di India ta hopi interesá pa establesé i eksportá for di Kòrsou pa region. Durante hopi dékada, negoshantenan di India a bin ta hunga un papel importante den ekonomia di Kòrsou, prinsipalmente den nos komersio através di Zona Franka i retail den nos sentro di siudat.
“Awendia tin hopi interes di parti di negoshantenan di India pa invertí den sektor di turismo, teknologia, bienestar i tambe sektor di farmasia”, e Embahador a duna di konosé.
“Kòrsou ta e sosio ideal den Karibe, nos ta bon situá, nos ta papia e idiomanan di region i nos ta stabil. Nos ta otro i nèt loke boso ta buskando”, Minister Mc William a informá e embahador. Durante e bishita aki, embahador Rajamony tabata kompañá pa e kònsùl honorario di India na Kòrsou Sr. Mahonar Sawilani, empresario di trayektoria largu aki na Kòrsou.
