Publiká riba 14 Yanüari 2020
WILLEMSTAD- Den kuadro di formulashon di un maneho pa nos sektor di koperativa lokal, Minister di Desaroyo Ekonómiko, Sra. Giselle Mc William a risibí i a hiba kombersashon ku funshonario di Konseho Nashonal di Koperativa (Nationale Cooperatie Raad) di Hulanda. Ta trata aki di señora Marijke Flamman kende aktualmente ta di di bishita na Kòrsou.
Na e momentunan aki Kòrsou ta trahando pa duna kontenido na nos propio Maneho di Koperativismo. E enfoke ta, pa krea un maneho den kua ta regla i regulá áreanan di koperashon komun di un forma muchu mas efektivo, yuda na momento di duna forma na statutonan i otro areglonan mutuo i mas ku klaro tambe yuda engrandesé e forsa ekonómiko di nos empresanan lokal.
Ku esakinan den mente, minister Mc William a hasi uso di e bishita di sra Flamman pa asina skucha i interkambiá riba e forma kon Hulanda a bin ta duna kontenido na e konsepto di koperativismo durante e añanan tras di lomba. Durante e kombersashon por ehèmpel a toka métodonan ku aktualmente ta keda usá na Hulanda den e sektor, pero tambe e mihó práktikanan ku a keda demostrá segun eksperensia di e Konseho Nashonal di Koperativa. Kada un di esakinan ku e meta pa trese un boost den e forma kon koperativismo ta brinda servisio den e diferente sektornan manera entre otro e sektor di kuido, e sektor di turismo i tambe e sektor energétiko.
Ku implementashon di e métodonan aki den sektor di koperativismo, Hulanda no solamente a logra di krea mas komersiante i mas kuponan di trabou pero spesífikamente den sektor di kuido a logra di baha gastunan den e aparato konsiderablemente.
Un di e enfokenan primordial ora ta trata desaroyo di nos propio maneho di koperativismo ta e parti legislativo mara na e sektor aki. Pa por sigui interkambiá mas a fondo i duna mihó kontenido na e área aki, minister Mc William a sugirí un posibel koperashon di trabou entre Kòrsou i e Konseho Nashonal Di Koperativa. Pa medio di un koperashon di trabou lo por definí mihó e posibilidat pa un interkambio di konosementu i eksperensia ku e Konseho Nashonal riba entre otro e área legislativo i otro áreanan di interes.
Aparte di e área legislativo a identifiká tambe áreanan riba tereno di formashon kaminda posiblemente e Konseho Nashonal lo por kompartí prinsipio i kódigonan di koperativa ku aktualmente ta keda implementá na Hulanda for di kual nos por saka eksperensia i posibel sugerensianan pa nos propio maneho.
E bishita di sra Flamman tabata unu fruktífero i yen di oportunidatnan nobo. Di tal grado ku tantu sra Flamman komo minister Mc William a ekspresá e deseo pa riba término korto formulá un akuerdo spesífiko di koperashon kual lo por duna frutanan balioso pa desaroyo i implementashon di nos propio maneho di koperativismo kual e ministerio lo ke yega na dje a korto plaso.
