Publiká riba 13 Mei 2026
Willemstad. Gobièrnu di Kòrsou a tuma e desishon di paga e gratifikashon di fakansi adelantá na tur amtenar.
E desishon aki a tuma luga abase di un petishon di sindikato ABVO di dia 5 di mei 2026 pa paga e gratifikashon di fakansi promé ku normalmente ta sosodé. Sindikato a señalá varios desaroyo sosial i ekonómiko ku aktualmente ta pone hopi preshon finansiero riba famianan na Kòrsou.
Segun ABVO, preisnan di produkto básiko, kombustibel i energia a subi konsiderablemente for di mitar di yüli 2026 pa motibu di tenshonnan geopolítiko internashonal. Ademas, periodo di fakansi tambe ta trese gastunan adishonal pa famianan, manera gastu pa transporte, rekreashon i kuido di mucha.
Un otro sirkunstansia speshal e aña aki ta e partisipashon di Kòrsou na e próksimo mundial di futbòl. E klasifikashon históriko aki lo resultá, segun speransa, den gastunan sosial i familiar mas haltu. For di momentu ku selekshon di Kòrsou a kualifiká pa mundial, hopi amtenarnan a expresá nan deseo pa asistí na e weganan i sostené nos selekshon nashonal.
Despues di risibí e petishon di ABVO, minister Hato a pidi konseho na ministerionan konserni. Despues di deliberashon entre e Sekretario General di ministerio di Gobernashon, Planifikashon i Servisio Públiko (BPD), e Sekretario General di ministerio di Finansa i e Direktòr di SSO a resultá ku un ehekushon kuidadoso i responsabel di e pago adelantá ta téknikamente posibel no mas trempan ku dia 5 di yüni 2026. Pa prome biaha ta paga e gratifikashon di fakansi na rason di8% na tur nos ambtenar.
E minister di ministerionan di Gobernashon, Planifikashon i Servisio Públiko i di Hustisia, señor Shalten Hato, ta rekonosé e balor históriko di partisipashon di Kòrsou na mundial i ta expresá su apresia pa e entusiasmo i sosten ku e personal gubernamental ta mustra pa nos selekshon nashonal. Tambe ta resaltá ku e gratifikashon di fakansi ta destiná pa yuda e ambtenar ku su gastunan adishonal durante e periodo aki.
Ku e pago adelantá aki, minister Hato ke pone amtenarnan den mihó posishon pa por kumpli ku nan obligashonnan finansiero na tempu i alabes duna un alivio den un periodo di subida di kosto di bida.
