Publiká riba 10 Yüni 2025
WILLEMSTAD – Djamars mainta, durante un reunion formal, Minister di Hustisia Shalten Hato a hasi entrega ofisialmente di e dokumentu di traspaso na Minister nobo di Ministerio di Gobernashon, Planifikashon i Servisio (BPD), Sra. Kimberly Lew-Jen-Tai. E traspaso aki ta parti di e proseso di transishon struktural pa garantisá kontinuidat den liderato i bon funshonamentu di e ministerio.
Durante su palabra, Minister Hato a ekspresá su satisfakshon ku e manera den kua e transishon a tuma lugá. “Mi ta konfiá ku Sra. Lew-Jen-Tai lo tuma e liderato ku determinashon, integridat i vishon kla pa sigui traha na benefisio di un gobernashon transparente i un organisashon públiko ku ta sirbi pueblo ku dedikashon,” Hato a bisa.
Minister Lew-Jen-Tai, den su reakshon, a ekspresá su gradesimentu pa e dokumento kla, ku vários punto struktura i informashon balioso inkluí den e dokumentu di traspaso. “E dokumentu ta duna un bista klaro riba e estado aktual di e ministerio, desaroyo importante, i desishon stratégiko ku ta di gran importansia i nifikashon pa e kontinuashon di e trabou den e ministerio. Mi ta agradesido pa e preparashon ku a tuma lugá,” segun Minister Lew-Jen-Tai.
Ámbos minister a enfatisá importansia di kontinuidat, kolaborashon interministerial i liderato fuerte pa garantisá bon gobernashon. E akto di entrega di dokumentu di traspaso ta simbolisá un paso importante den e proseso di transishon pa benefisio di e organisashon i komunidat henter.
