Publiká riba 18 Mart 2025
WILLEMSTAD, – Durante di un seremonia impreshonante djadumingu anochi, Minister di Hustisia, mr. Shalten Hato a huramentá 27 personal nobo komo ámtenar pa forma parti di Kuerpo di Brantwer Kòrsou. Miéntras ku a repartí alrededor di 50 dekreto gubernamental pa diferente promoshon den rango den e organisashon. E seremonia aki a konta ku koleganan bombero ku a asistí pa selebrá otro logro mas den e kuerpo. Tantu Komandante di Brantwer Kòrsou, ing. Jair Tromp MBA, i tambe Minister di Hustisia, mr. Shalten Hato a para ketu na e diferente logronan ku a logra pa e kuerpo durante aña 2023, 2024 i tambe lokual tin den perspektiva pa 2025. Entre otro ta en espera di 3 tankautospuit pa fortifiká e vehíkulonan di e Kuerpo di Brantwer, miéntras ta pendiente pa terminá tambe e espasio di entrenamentu pa bomberonan na Koraal Specht.
Durante e seremonia, 8 persona a ser promoví na e rango di “Bevelvoerder”. E promoshon aki ta reflehá nan dedikashon, esfuerso i preparashon pa asumí e responsabilidat mayó den e departamento di Represhon. Ku e rango nobo, nan lo tin e tarea di dirigí i koordiná nan plug durante un situashon di emergensia, garantisando un reakshon mas rápido i efisiente. Ademas, un grupo di 14 persona a finalisá nan formashon pa HoofdBrandwacht (HBT). E klas aki a kompletá un programa intensivo di kapasitashon, preparando nan pa asistí den situashonnan di riesgo i difísil, komo ekipo di apoyo den e departamento di bombero. Nan konosementu lo yuda fortalesé e kapasidat di e kuerpo di bombero na Kòrsou. Un total di 8 sentralista tambe a risibí di forma ofisial nan dekreto gubernamental i pronto den luna di aprel lo kuminsá ehersé e funshon aki.
E klas nobo di bombero ku a start dia 2 di Yanüari 2024 a logra di optené nan promé sertifikado ofisial i asina un total di 21 persona a huramentá komo ámtenar i komo miembro di Brantwer Kòrsou. E huramentashon ta simbolisá nan kompromiso pa sirbi komunidat ku entrega i balentia den kada situashon. Minister Hato a eksprimi su gratitut i orguyo pa e bomberonan, rekonosé nan esfuerso i dedikashon pa manten’é seguridat i bienestar di e isla. El a suprayá e importansia di un kuerpo di bombero fuerte i bien prepará, segurando un servisio di kalidat pa komunidat i na final e Minister a sorprendé tur e bomberonan ku un sertifikado di Apresio personalisá pa kada unu por kòrda ku nan ta un héroe den nos komunidat kada momentu ku nan ehersé nan trabou.
E seremonia a finalisá ku un momentu di felisitashon i motivashon, kaminda koleganan a duna nan apoyo i stimulashon pa e reto nobo ku nan ta enfrentá. E Ministerio di Hustisia i sigur Minister Hato lo kontinuá invertí den e formashon i desaroyo di e personal, pa fortalesé e kapasidat di e kuerpo i sigui sirbi e nashon ku profesionalismo i pashon.
