Minister Hensley Koeiman a hasi un bisita na Damen Shiprepair DOK - Informashon tokante Gobièrnu di Kòrsou Bo opinion

Notisia

Minister Hensley Koeiman a hasi un bisita na Damen Shiprepair DOK

Geplaatst op 29 September 2020 dor di Ministerio Desaroyo Sosial, Labor i Bienestar

Willemstad- Fin di siman pasá minister Koeiman den kalidat di minister di Desaroyo Sosial, Labor & Bienestar (SOAW) a hasi un bishita na Damen. Manera ta konosí djaluna 21 di sèptèmber 2020 a tuma lugá un suseso lamentabel kaminda dos sambuyadó a pèrdè nan bida na momento ku nan tabata ehersé nan trabou bou di laman.

Minister Koeiman a hiba un kòmbersashon ku direktor i tambe miembronan di gerensia pa asina duna rèspèt i haña informashon di e defuntunan i nan famia.
Durante e kòmbersashon minister a haña, entre otro, mas informashon di e dos personanan ku lamentablemente a pèrdè nan bida ehersiendo nan trabou. Nan tur dos ta relativamente hóben, ku famia hóben i ta empleá na Curaçao Industrial Diving, ku tin hopi aña prestando servisio profeshonal na Damen.

Minister a pone énfasis riba seguridat na trabou, un aspekto ku sigur meresé atenshon di nos tur pa asina evitá desgrasianan na trabou mas tantu posibel. Masha informashon konkreto minister no por a risibí, debí na e kaso ku ainda ta bou di investigashon.
Por a tuma nota ku gerensia di Damen ta hopi kibrá ku e suseso i ta wardando pa e investigashon terminá.
Minister Koeiman ta deseá e famianan di esnan ku a fayesé, trahadónan di Damen, di Curaçao Industrial Diving, i otro kontratistanan ku ta laborá pa Damen i gerensia di Damen hopi forsa den e momentonan difísil aki.

Entretantu entiero di e dos defuntunan a tuma lugá i awor ta spera ku mas pronto posibel por presentá resultado di e investigashonnan hasí dor di inspekshon di labor i Ministerio Públiko, pa esnan envolví i tambe pa pueblo haña mas detaye di e aksidente.

Ministerio konserní