Publiká riba 14 Mei 2019
Minister Jesus-Leito a firma akuerdo ku EWP pa konstrukshon di 500 kas.
Willemstad – Djamars 14 di mei Minister Zita Jesus-Leito a firma akuerdo ku Eigen Woning Plan (EWP) pa konstrukshon di 500 kas. Esaki ta den kuadro di proyekto Macro Public, Private, Partnership (PPP), kual ta nifiká ku gobièrnu ta traha huntu ku partnernan privá pa konstruí bibienda pa nos siudadanonan.
Minister Jesus-Leito huntu ku direktor di EWP señor Wendell Bonafacio i den presensia di empleadonan di ministerio di VVRP, trekker di e proyekto señor Wilfred Elsevier i presidente di hunta di komisario di Jansen en de Jong Groep señor Hans Smits a firma e akuerdo en kuestion.
Un di e nesesidatnan básiko den bida di un hende ta bibienda. Pa e motibu aki Minister Jesus-Leito tin esaki komo un di su prioridatnan i ta hasi tur loke ta posibel pa realisá proyektonan kual ta yuda kada persona yega na un bibienda pagabel.
Aparte di sòru pa kumpli ku e nesesidat di bibienda riba nos pais, e proyekto aki ta sòru tambe na kreashon di kuponan di trabou pa un periodo largu i tambe kombatimentu di okupashon ilegal.
E 500 kasnan aki ku pronto lo wòrdu konstruí ta ser repartí i konstruí den 6 bario eksistente. E barionan aki ta Mahuma Zuid , Montaña Abou fase II, Rooi Santu, Ronde Klip, Brakkeput fase II i Tra’i Seru.
Den dianan ku ta sigui Ministerio di VVRP huntu ku EWP lo kaba di hasi e trámitenan nesesario pa konstrukshon di e kasnan aki por kuminsá i tambe duna informashon tokante kon interesadonan por apliká pa un kas ku ta forma parti di e proyekto aki.
