Notisia

Willemstad – Minister Jesus-Leito ta felisitá Fundashon Kas Popular (FKP) ku su 40 aniversario. Durante di e selebrashon, Minister a felisitá i gradisí e trahadónan pa nan kada un su trabou, determinashon, esfuerso i pasenshi durante e añanan ku a pasa.

Gobièrnu di Kòrsou i FKP tin un historia largu.  Segun leinan mundial di derecho humano, i Kòrsou areglo di estado (artíkulo 25, insiso 2) ta indiká ku Gobièrnu mester duna atenshon na kreashon di sufisiente bibienda pa nos Pais. 

Banda di tabata desaroyando diferente otro proyekto di bibienda, Teritorio Insular di Kòrsou, esta ‘Bestuurscollege’, na aña 1945 a inisiá un proyekto di konstrukshon di kas di pueblo. Durante di periodo di 1945 pa 1976 un total di 4.591 kas a keda konstruí.

Teniendo na kuenta ku Gobièrnu su tarea prinsipal no ta pa fungi komo hürdó di bibienda, a funda FKP na 1979, 40 aña pasa, i enkargá esaki ku maneho di kasnan di pueblo. Na aña 1981, esaki a keda formalisá na momentu ku ‘Bestuurscollege’ a emití un dekreto trasladando tur outoridat, relashoná ku maneho di kasnan di pueblo, pa FKP.  

Ku esaki gobièrnu su tarea pa ku bibienda pa komunidat no a terminá. FKP, siendo un fundashon di gobièrnu, ta den estrecho komunikashon i kolaborashon kontinuo ku Gobièrnu di Kòrsou, pa asina krea e base nesesario pa sigui brinda nos pueblo mas mihó servisio pa loke ta trata bibienda.

E realidat ta, ku esaki a mustra di ta un desafio enorme teniendo na kuenta tur e rekursonan ku tin mester pa por konstruí bibienda na gran eskala, i asina kumpli ku e nesesidat ku tin den nos komunidat. 

Minister Jesus-Leito ta konsiente ku e situashon aki tin biaha por ta un tiki demotivante sigur pa trahadónan i klientenan di FKP. Minister Jesus-Leito a hasi un apelashon na FKP pa no pèrdè speransa i pa pone e enfoke riba logronan ku FKP huntu ku gobièrnu a bin ta realisá.

Esakinan ta por ehèmpel:

• E ‘beheersovereenkomst’ entre Gobièrnu i FKP ku despues di 40 aña porfin por bisa ku awor si ta yegando e punto final pa keda akordá,
• Trabounan di mantenshon na kasnan den diferente bario,
• Konstrukshon di apartamentonan na Sapaté, den un forma fásil i moderno,
• Komunikashon di un forma mas dirigí pa ku pueblo di Kòrsou,
• Futuro proyektonan di konstrukshon di bibienda, p.e. Wechi

Asina tin hopi mas proyekto ku FKP por ta orguyoso di dje. Huntu lo sigui traha pa supli e nesesidat di nos komunidat.

MAS NOTISIA

Ministerio konserní: Tráfiko, Transporte i Planifikashon Urbano