Publiká riba 29 Novèmber 2020
E direktiva a entrega na minister Koeiman nan “Dokumento Básiko” kaminda ampliamente ta splika nan metanan i nan forma di trabou. Riba e portrèt por mira entrega di e dokumento.
Willemstad – Djaweps último minister Koeiman a risibí na su despacho e direktiva di “Healthy Aging Club”. E fundashon aki tin komo meta, pa promové “biba salu” bou di esnan di 55 aña òf mas.
Ta un echo ku aki na Kòrsou tambe nos siudadanonan ya ta alkansando un edat mas altu kada dia. Nos edat promedio, e asina yama “life-expectancy” ya ta alkansando 80 aña. Pero ta importante pa un persona alkansá un edat haltu den un bon estado di salú. Healthy Aging Club ta promové esaki, pero biba salú ku un aserkamentu holístiko. Biba salú di un forma total i integral i no solamente pa loke ta e parti físiko.
Bira grandi ku un bon salu ta posibel ku un estilo di bida saludabel, esta un “healthy lifestyle”.
Un “healthy Lifestyle” tin 8 punto di konsentrashon. Esakinan ta, (1) salú físiko, (2) salú sosial, (3) salú finansiero, (4) salú emoshonal, (5) salú intelektual, (6) salú spiritual, (7) salú okupashonal i (8) salú ambiental.
Healthy Aging Club ta konsentrá riba e 8 puntonan aki. Promoviendo optimalisashon di e 8 puntonan aki, lo por logra ku e siudadano di 55 aña pa ariba lo por tin un estilo di bida mas saludabel, pues un healthy lifestyle. Ku un estilo di bida saludabel, lo por logra e meta final ku ta “Healthy Aging”.
E aserkamentu total aki di “Healthy Aging Club” ta algu ku ta den desaroyo mundialmente. E organisashon mundial di salú “WHO” den su rapòrt riba bira grandi i salú (World Report on Aging and Health / 2015) ya a dediká atenshon amplio na e tópiko aki.
Pero tambe den nos Areglo di Estado mes (Staatsregeling art.24 i 25), tin stipulá ku asuntunan manera stimulá bienestar, salú di pueblo, salú ambiental, bibienda, salú okupashonal, ets., ku esaki nan ta derechonan fundamental (grondrechten) ku mester haña atenshon.
Ku otro palabra, “Healthy Aging Club” ta den bon kompania.
Minister Koeiman di su banda a indiká ku ya pa algun tempu e tópiko aki tin su atenshon. Ya el a bin ta dediká tempu na e tópiko di un mihó futuro pa nos siudadanonan mayor. Esaki entre otro a keda demostrá ku e rapòrt ku el a laga traha riba maneho pa ku personanan mayor. E rapòrt aki “Toekomstbestendig Seniorenbeleid” a ser trahá aña pasá i esaki ya ta den proseso di ser ehekutá.
E direktiva di Healthy Aging Club a duna minister Koeiman un splikashon amplio di nan metanan i nan aktividatnan.
E promé direktiva ta konsistí di profeshonalnan ku amplio eksperensia den e áreanan sosial, legal i fiskal.
Konforme nan estatuto i di akuerdo ku nan sentido síviko, nan a ofresé na minister Koeiman nan yudansa pa loke ta konseho i ehekushon di e maneho di bira grandi en general, pero mas ainda bira grandi ku salú.
