Publiká riba 20 Novèmber 2018
Willemstad – Awe ta Dia Internashonal di Derechi di Mucha. Riba e dia aki nos ta para ketu na importansia di e Tratado Internashonal tokante Derechi di Mucha i na kon nos ta kumpliendo ku loke e ta stipulá den nos pais.
E aña aki a kumpli 20 aña ku Kòrsou a ratifiká e tratado. Durante e 20 añanan ku a transkurí tabatin diferente desaroyo konkreto riba kada un di e áreanan ku e tratado ta kubri. E áreanan aki ta: bienestar, salú, enseñansa i hustisia. Sin embargo, no tur kos ta reglá ainda i diferente insidente resien ta pone nos komo komunidat para ketu na kon importante ta pa nos kuida nos muchanan.
Ku ratifikashon di e Tratado Internashonal pa Derechi di Mucha Kòrsou a bai di akuerdo pa sòru pa tur mucha na Kòrsou lanta salú, sigur i ku amplio posibilidat pa desaroyá nan mes segun nan propio potensial. Banda di Gobièrnu di Kòrsou, kada siudadano adulto tin e deber síviko pa kuida nos muchanan. Minister Hensley Koeiman di Desaroyo Sosial, Labor i Bienestar ta resumí esaki ku e proverbio afrikano: “It takes a village to raise a child”. Segun Minister Koeiman, nos mester keda kòrda e proverbio aki, mirando ku kòntròl sosial ta un balor importante den edukashon di mucha i hóben. Alabes, den mesun rosea Minister Koeiman ta enfatisá ku e responsabilidat primario pa sa unda nos muchanan ta, ku ken i enbolbí den ki tipo di aktividat, ta serka kada mayor. Gobièrnu sin mas ta desplegá un papel importante i no tin duda ku komunidat por duna un man den tira bista i mèldu aktividatnan iregular, sin embargo, kada mayor ta e promé persona yamá pa kuida i pa ta enbolbí den tur loke ta pasa den bida di su yu(nan).
“Un mayor tin e deber di sòru pa su yu ta bon kuidá na tur momentu, asta ora e mes no por ta presente”, Minister Koeiman ta sigui amplia. P’esei ta importante pa kada mayor sòru di tin bon informashon tokante tur aktividat ku su yu ta enbolbí den dje, banda di skol.
Riba e dia spesial aki, Minister Koeiman ta reiterá su kompromiso ku tur mucha ku ta biba na Kòrsou. Mas informashon tokante pasonan importante ku Gobièrnu di Kòrsou a tuma i ta tumando pa salbaguardiá kuido di nos mucha i hóbennan lo sigui pronto.
