Notisia

Durante su estadia na Hulanda, Minister di Enseñansa, Siensia, Kultura i Deporte, sra. drs. Marilyn Alcalá-Wallé huntu ku Minister Plenipotensiario sr. Anthony Begina a reuní ku representantenan di Missing Chapter Foundation, sra. Marloes van der Have i sra. Zita Luna. E dos representantenan aki a bini na nòmber di Prinsesa Laurentien van Oranje, ku ta fundador di e organisashon.

Meta di Missing Chapter Foundation ta pa stimulá inklushon di muchanan i hóbennan den forma di diálogo den tomo di desishon ora ta trata di preguntanan klave den komunidat ku tin di haber ku nos presente i futuro. Punto di salida ta ku muchanan ta futuro di mañan i nan ta bai manehá i goberná nos pais, es mas nos mundu. Pa e motibu aki ta importante pa skucha perspektivanan di nos futuro generashon den un ambiente sano di diálogo. Muchanan i hóbennan por kontribuí ku preguntanan, ideanan, posibel solushonnan kreativo ku ta duna guia na e proseso di tomo di desishon. Missing Chapter Foundation ta intermediá ku nan ekspertisio entre muchanan, hóbennan i adultonan. Nan ta duna sosten na skolnan, empresanan i organisashonnan sosial na momentu ku esakinan ta deseá di inkluí muchanan i hóbennan den desishonnan.  

Pa e komunikado kompletu por ‘download’ esaki aki: Komunikado inklushon di nos muchanan i hóbennan pa medio di diálogo

Riba potrèt por mira Minister di Enseñansa, Siensia, Kultura i Deporte, sra. Marilyn Alcalá-Wallé,

Minister Plenipotensiario sr. Anthony Begina huntu ku

representantenan di Missing Chapter Foundation, sra. Marloes van der Have i sra. Zita Luna.

MAS NOTISIA

Ministerio konserní: Enseñansa, Siensia, Kultura & Deporte