Publiká riba 04 Sèptèmber 2026
Willemstad – Dr. Roderick Middelhof, Minister di Desaroyo Ekonómiko i sra. Raiska Herrera di Qredits Kòrsou ta reintrodusí Agrifonds, ku kasi Cg 1,4 mion na fiansa disponibel pa empresarionan den sektor di agrikultura i peska. Danki na supsidio di Ministerio di Desaroyo Ekonómiko (MEO), empresarionan ku ta bini na remarke por fia via Qredits Kòrsou na un tasa di interes di solamente 2%, en bes di e tasa regular di 9,95%.
MEO ta pone un total di mas ku Cg 403.000 na supsidio disponibel pa e inisiativa. Di e montante aki, mas ku Cg 353.000 ta destiná pa e supsidio di tasa, ku ta hasi posibel pa Qredits pone e kapital na fiansa disponibel pa empresarionan den sektor di agrikultura i peska. E otro Cg 50.000 ta destiná pa Agri Business Academy, ku ta enfoká riba fortalesé konosementu i kapasidat empresarial den sektor agrario.
E fiansa por yega te Cg 100.000 pa empresario i por wordu usá pa invershon den, entre otro, ekipo, sistema di irigashon, infrastruktura, bestia, produkshon di kultivo i ekipo di peska. Empresarionan ku ta bini na remarke ta risibí tambe un periodo di seis luna sin amortisashon, durante kua nan ta paga solamente interes.
“Ku Agrifonds nos ta hasi finansiamentu mas pagabel i aksesibel pa empresarionan lokal. Esaki ta duna nan mas espasio pa invertí den nan empresa, fortalesé produkshon alimentario lokal i kontribuí na seguridat alimentario di Kòrsou,” Minister di Desaroyo Ekonómiko, Dr. Roderick Middelhof, a indiká.
Qredits Kòrsou ta fasilitá e fiansa i ta guia e empresario durante e proseso. “Na Qredits Kòrsou nos ta mira tur dia e pashon, perseveransia i talento den nos sektor di agrikultura i peska. Nos ta orguyoso di por kontribuí na hasi fiansa pa negoshi mas aksesibel pa nos empresarionan i asina aportá na fortalesimentu di nos seguridat alimentario i ekonomia,” Raiska Herrera, Branch manager di Qredits Kòrsou, a deklará.
E kolaborashon ta sigui riba un trayekto anterior entre MEO i Qredits. Na 2024, Qredits Kòrsou a otorgá mas ku Cg 400.000 na fiansa na empresarionan den sektor agrario.
Empresarionan interesá por tuma kontakto ku Qredits Kòrsou via 465-8282 òf www.curacao.qredits.com pa mas informashon i aplikashon.
