Publiká riba 16 Sèptèmber 2026
Mi NEGOSHI ta sigui amplia guia, coaching i formashon pa empresario lokal komo parti integral di MEO
Willemstad – Mi NEGOSHI Shared & Support Services (MNSSS) ta sigui fortalesé su sosten na empresarionan lokal, despues ku e programa a pasa kompletamente bou di Ministerio di Desaroyo Ekonómiko (MEO) for di 1 di aprel 2026. Den e promé ocho lunanan di aña, MNSSS a sigui asistí empresarionan via coaching, training, wèbinar, seshon di profundisashon i orientashon empresarial.
E transishon pa MEO, ta sigui ankra Mi NEGOSHI komo un instrumento di sosten pa empresario, kaminda coaching, formashon, informashon i konekshon ku diferente partner den e ekosistema empresarial ta bini huntu.
“Ku Mi NEGOSHI bou di MEO, nos ke sigui trese sosten mas serka di empresario. No solamente ora un empresario tin un problema, pero tambe pa yud’é strukturá, profesionalisá i prepará su negoshi pa kresementu,” Minister di Desaroyo Ekonómiko, Dr. Roderick Middelhof, a indiká.
Demanda pa guia empresarial
Den e promé dos kuartalnan di 2026, 34 trayekto di coaching a kuminsá, di kua 13 a finalisá. Asistensia pa desaroyo di business plan i atministrashon general ta entre e áreanan ku ta mustra mas demanda. Pa sigui amplia su kapasidat, MNSSS ta traha tambe riba ampliashon di su pool di Business Advisors.
Ademas di coaching, den e promé ocho lunanan di aña MNSSS a organisá sinku tayer pa empresario. Entre e tópikonan ku a resaltá tabatin “E empresario i su debernan fiskal”, duná dor di SBAB. Tambe a introdusí Breakfast, Brew & Breakthroughs (BBB), un konsepto ku ta ofresé un ambiente mas íntimo i interaktivo pa empresarionan profundisá den tópikonan relevante pa desaroyo empresarial.
Den e siguiente periodo, Mi NEGOSHI lo sigui enfoká riba hasi sosten empresarial mas aksesibel, práktiko i konektá ku e realidat di empresario di Kòrsou. Ku Mi NEGOSHI komo parti di MEO, MEO ta sigui fortalesé e struktura di sosten pa empresario mikro, chikí i mediano na Kòrsou.
Por tuma kontakto ku Mi NEGOSHI via minegoshi@gov.cw.
