Publiká riba 26 Mei 2026
Minister di Desaroyo Ekonómiko, señor Dr. Roderick Middelhof, ta anunsiá ku hopi orguyo ku e anteriormente Mi NEGOSHI Platform ofisialmente lo kontinuá bou di e nòmber nobo Curaçao SME Platform. Esaki, entrante 24 di aprel 2026 último. E kambio stratégiko di nòmber aki ta marka un fase importante nobo den e fortalesimentu i profesionalisashon di e apoyo na e sektor di empresanan chikí i mediano (MKB) na Kòrsou.
Ku entrada di e dekreto gubernamental nobo ‘instellen Curaçao SME Platform’, bou di liderato di Minister Middelhof, a skohe deliberadamente un nòmber ku ta konektá mihó ku e posishonamentu internashonal, ambishonnan i bista pa futuro di e plataforma. Na mes momentu, a ekspandé e kantidat di organisashonnan partisipante i krea un kolaborashon mas amplio i mas fuerte entre stakeholdernan públiko i privá. Ku esaki, Minister Middelhof ta konfirmá di nobo su kompromiso aktivo pa sigui desaroyá un klima empresarial duradero, inovador i kompetitivo na Kòrsou.
Curaçao SME Platform tin komo meta pa koordiná mihó inisiativa- i aktividatnan den e sektor di MKB, intensifiká e kolaborashon entre instansianan i krea oportunidatnan konkreto huntu pa empresarionan lokal. Segun Minister Middelhof, un komunidat di MKB fuerte i resistente ta forma e kolumna vertebral di un ekonomia salú i prepará pa futuro.
Ademas di e miembronan aktual, inkluyendo Ministerio di Desaroyo Ekonómiko, Kámara di Komèrsio, Curaçao Innovation & Technology Institute (CITI), Stichting Belastingaccountantsbureau (SBAB), Korpodeko, Qredits, OBNA, Maduro & Curiel’s Bank (MCB), Inspekshon di Impuesto, EU-desk Curaçao i Fundashon Marshe, representantenan di University of Curaçao Dr. Moises da Costa Gomez (UoC), Mi NEGOSHI Shared & Support Services, Asosashon di Empresanan Chikí di Kòrsou (ADECK) i APC Bank tambe a uni na e plataforma.
Minister Middelhof ta mira ku entusiasmo riba un fortalesimentu kontinuo di e kolaborashon den e platforma i pa e esfuerso komun pa e desaroyo duradero di MKB na Kòrsou.
