Minister Pietersz- Janga a bishitá sentro di resiklahe Green Phenix - Informashon tokante Gobièrnu di Kòrsou

Notisia

Ministerio konserní Salubridat Públiko, Medio Ambiente i Naturalesa
 

Minister Pietersz- Janga a bishitá sentro di resiklahe Green Phenix

Publiká riba 05 Ougùstùs 2022

Willemstad –  Resientemente Minister di Salubridat, Medio Ambiente i Naturalesa drs. Dorothy Pietersz- Janga a bishitá Green Phenix. Green Phenix ta un kompania spesialisá den kolektá, eksportá i resiklá tur tipo di plèstik kaminda alabes mas ku 30 persona ta laborá. Minister a bishitá e kompania huntu ku miembronan di su kabinete i nan a keda risibí pa señora Sabine Berendse kual a duna un rekorido den tur e departamentunan. Na final di e rekorido Minister por a tuma nota di e produktonan ku Green Phenix ta elaborá ku plèstik resiklá. Minister Pietersz- Janga a bishitá e sentro di resiklahe aki den kuadro di su proklamashon di aña di limpiesa.

Durante e rekorido Minister i su delegashon por a tuma nota di tur e aspektonan di resiklahe di plèstik for di momentu ku entregá esaki na Green Phenix. Resiklahe ta un aspekto sumamente importante den kuido di medio ambiente. Resiklahe ta krea trabou, krea entrada pa pais, hasi komunidat konsiente, re-uza materia prima i ta redusí e kantidat di shushi ku mester bai landfill. Minister Pietersz- Janga su mensahe ta, pa ban resiklá mas tantu posibel. Hiba tur plèstik na e sentronan di kolekta entre otro na Green Phenix na Zeelandia i supermerkadonan i asina kontribuí ku kuido di nos medio ambiente i desaroyo di Kòrsou.