Publiká riba 01 Yüni 2023
Willemstad – Durante e fin di siman ku a pasa, Minister di Asuntunan General enkargá ku sektor di Agrikultura, Medio Ambiente i Naturalesa di Ministerio di GMN señor Gilmar Pisas a hasi diferente bishita. Primeramente Minister Pisas a bishitá Federashon Kooperativanan Uní di Produkshon (KUP) na playa di Daai Booi. Despues Minister a bishitá Boca Ascension pa personalmente tuma nota di e situashon di Sargassum i finalmente Minister a bishitá Piskadónan di Playa Piskadó na Wèstpunt.
Durante e bishita na Daai Booi Minister Pisas a hiba kombersashonnan ku señor Lucas presidente di KUP i señor De Lanoy presidente di organisashon di piskadó di Boneiru PiskaBon. A deliberá entre otro tokante aspektonan ku ta stroba piskadónan di Boneiru i di Kòrsou piska liber den awanan rondó di e islanan. Relashoná ku esaki Minister Pisas ya a hasi palabrashonnan ku funshonarionan konserní pa atendé e punto importante aki. Na final di e bishita Minister a presensiá firmamentu di un akuerdo di kooperashon entre KUP i PiskaBon. Ta trata aki di un akuerdo pa huntu atendé retonan ku piskadónan di ámbos isla ta konfrontá i formashon di piskadó komo fishi.
Na Boca Ascension Minister Pisas por a tuma nota di e situashon di Sargassum. Mester bisa ku e molèster pa loke ta trata e bahia no ta ekstenso manera e tabata pasobra naturalesa mes a sòru pa deskomposishon di gran mayoria di e alga marino aki. Esaki apesar ku algun siman pasá tabatin molèster di holó stinki den barionan den bisindario. Na e sitio Minister Pisas a haña splikashon di kolaboradónan di su departamentunan di e forma kon lo atendé ku e problemátika aki den futuro. Na Playa Piskadó, piskadónan a konta Minister e retonan ku nan ta konfrontá di e turismo intensivo ku ta bini pa wak e turtuganan. Minister Pisas a mustra ku mester atendé esaki i bini ku un solushon duradero pa piskadónan i turismo.
