Publiká riba 01 Yüni 2023
Willemstad – E Lei di Bienestar di Animal a drenta na vigor promé di yanüari 2023. Ministerio di GMN i Fundashon Kuido di Animal ta enkargá ku ehekushon di e lei aki. Minister di Asuntunan General enkargá ku sektor di Agrikultura, Medio Ambiente i Naturalesa di Ministerio di GMN señor Gilmar Pisas huntu ku tim di maneho di GMN i Asuntunan Veterinario a reuní ku Fundashon Kuido di Animal (Dierenbescherming) pa deliberá tokante e diferente retonan ku a topa despues ku e lei a drenta na vigor. E liña kòrá den esaki ta e aspekto finansiero i personal spesialisá pa parti di mantenshon di e lei.
Ministerio di GMN a presupuestá un montante pa ehekushon di e lei pero importante ta tambe e donashonnan ku Fundashon Kuido di Animal ta risibí mirando ku e fondonan no ta sufisiente pa por logra e efekto deseá. Mester bisa ku apesar di e situashon finansiero tòg Fundashon Kuido di Animal ta hasiendo nan máksimo esfuerso. For di e ingreso aki e fundashon ta hasi entre otro proyektonan di konsientisashon i kontròl pero tambe programanan di sterelisashon. Importante ta tambe e personal kalifiká. Lo atendé e punto aki tambe komo ku aktualmente e fundashon ta disponé solamente di 2 Inspektor agente èkstra ordinario kual no ta sufisiente.
Ta konosí ku tin por ehèmpel hopi kacho ta kana los tur kaminda kual ta okashoná bastante molèster na diferente sitio. Awor ku e Lei di Bienestar di Animal aki a drenta na vigor, ta importante pa kada unu di nos ku tin animal na kas, pa tuma nota di e lei aki. Ta importante pa nos asumí nos responsabilidat i kaminda ta nesesario sòru pa nos kura ta bon será i òf hasi uzo di e programa di sterelisashon. Minister Pisas huntu ku GMN i Fundashon kuido di Animal lo bini huntu denter di algun siman pa asina kana konforme di un “stappenplan” pa atendé e situashon.
