Publiká riba 10 Novèmber 2026
Willemstad – Marshe BETH tei atrobe! Minister di Desaroyo Ekonómiko, Dr. Roderick Middelhof, ta invitá henter komunidat di Kòrsou pa bin disfrutá di un edishon nobo di Marshe BETH, ku lo tuma lugá djadumingu 29 di novèmber 2026, di 3’or di atardi pa 10’or di anochi, na Marshe Rondó, rònt di e marshe. E evento ta organisá pa Ministerio di Desaroyo Ekonómiko (MEO) i Mi NEGOSHI Shared & Support Services.
Bou di e lema “Nos Produkto. Nos Orguyo!”, Marshe BETH ta pone énfasis riba importansia di konsumí lokal, sostené nos empresarionan i stimulá kresementu di ekonomia lokal.
E evento aki ta ofresé empresarionan lokal un plataforma pa presentá i bende nan produkto i servisio, amplia nan visibilidat i konektá direktamente ku konsumidónan. Na mes momentu, e ta brinda públiko un oportunidat pa deskubrí e variedat di produkto ku nos empresarionan tin di ofresé.
Stimulá emprendementu i sostené nos ekonomia lokal
Marshe BETH ta forma parti di e esfuersonan di MEO pa fortalesé emprendementu lokal i stimulá partisipashon ekonómiko. Dor di krea oportunidatnan pa empresarionan chikí, e inisiativa aki ta kontribuí na un ekonomia mas dinámiko i sostenibel. Kada kompra lokal ta un forma di sostené nos empresarionan, stimulá kresementu di nan negoshi i kontribuí na desaroyo ekonómiko di Kòrsou.
Inskripshon pa bendedónan ta habrí!
Minister Middelhof ta invitá empresarionan lokal ku ta interesá pa partisipá komo bendedó durante Marshe BETH pa registrá nan mes. Por inskribí via e siguiente lenk: bit.ly/beth2026. Pa mas informashon, interesadonan por manda un mensahe via WhatsApp na 529 7206 òf 529 7210.
Un invitashon na henter komunidat
Minister Roderick Middelhof ta hasi un yamada na henter komunidat pa bin bishitá Marshe BETH, deskubrí nos produkto lokal i sostené nos empresarionan. Ku e evento aki, MEO i Mi NEGOSHI ta sigui stimulá un kultura di konsumí lokal i duna empresarionan mas oportunidat pa desaroyá nan negoshi.
