Publiká riba 01 Febrüari 2019
WILLEMSTAD- Minister di Desaroyo Ekonómiko, sr. Steven Martina a presentá djabièrnè dia 01 di febrüari un resúmen amplio di e reto i desaroyonan ekonómiko ku Kòrsou a eksperensia durante aña 2018 i a duna un vishon sigui pa un bista riba e perspektivanan ku tin pa ku e aña 2019 riba tereno ekonómiko.
E presentashon aki a keda inisiá reflehando riba tantu e reto komo logronan ku aña 2018 a trese kuné pa nos sektor ekonómiko. E retonan di aña 2018 ku Kòrsou mester a eksperensiá tabata ku efektonan palpabel.
Konsiente di e impakto negativo ku e diferente situashonnan tabata tin riba Kòrsou su ekonomia durante aña 2018 i ku e afan pa trese kambionan positivo den esaki, ministerio di Desaroyo Ekonómiko huntu ku Minister Martina a lansa e Programa di Rekuperashon Ekonómiko. Pa medio di e programa di rekuperashon aki ministerio di Desaroyo Ekonómiko a bin ta traha inkansabelmente riba entre otro e desaroyo di Kòrsou su sektor turístiko durante 2018. Tambe e maneho tabata dirigí riba stimulashon i fasilitashon di invershonnan tantu públiko komo esnan priva, duna mas empuhe na e espíritu empresarial di hendenan lokal mes, i stimulá mikro empresa, empresanan chikí i tambe esnan mediano.
Pa loke ta trata aña 2019, Gobièrnu di Kòrsou a aprobá e asina yama Groeistrategie di kua e strategia ekonómiko pa rekuperá Kòrsou su ekonomia ta forma parti di dje. Den kuadro di e “Groeistrategie” ku ta dirigí riba un aserkamentu integral atraves di diálogo i kolaborashon Minister Martina lo kontinuá ku e aserkamentu dual ku ta dirigí pa riba término kòrtiku- i medio largu implementá programanan ku nan respektivo proyektonan pa duna empuhe inmediato na desaroyo ekonómiko dor di krea aktividat ekonómiko i krea kuponan di trabou, i alabes pa implementá manehonan struktural ku ta garantisá desaroyo duradero.
Minister Martina ta sumamente positivo ku tin oportunidatnan real pa asina pais Kòrsou por sigui rekuperá ekonómikamente. Por ehèmpel tin pa e aña aki diferente proyekto magno ku ya a keda anunsiá i ku konhuntamente atraves di diálogo i kolaborashon ku stakeholders i aktornan lo hasi tur loke ta na alkanse pa esakinan por ta eksitoso. Entre otro a anunsiá e proyekto hotelero Corendon loke konosé komo Holiday Beach Veneto den un kompleho di 800 kamber. Aparte di esaki nos a kordiná tambe programanan konkreto pa desaroyo di e áreanan di Ref, Zakitó, Kop van Scharloo, Marichi, Caracasbaai, Bullenbaai i diferente otro área. Tambe a inisiá e proseso pa eliminá “Red Tape” di un forma struktural pa asina por duna un trato di “ Red Carpet” na invershonistanan. Esakinan ta djis algun for di tur e tremendo inisiativanan i kontinuashon di trabounan duru ku a bin ta tuma lugá pa loke ta trata ekonomia di pais Kòrsou. Importante ta, pa den e aña aki e esfuersonan kombiná ku koperashon aktivo di komunidat di Kòrsou logra bòltu e kurva negativo den un kurva positivo i asina alkansá rekuperashon ekonómiko pa Kòrsou. Ku e perseveransia i persistensia nesesario i si huntu nos kontinuá ku e trabounan duru i konsistente nos por ta sigur ku nos lo logra.
Pa por lesa e dokumento di e resúmen ekonómiko kompletu, bishita e página di Facebook di Ministerio di Desaroyo Ekonómiko
