Publiká riba 16 Aprel 2019
Willemstad – Minister di Tráfiko, Transporte i Planifikashon Urbano señora Zita Jesus-Leito ku asombro a tuma nota di diferente deklarashon den prensa tokante su persona. E deklarashonnan aki ta trata un posibel implementashon di e sistema di Uber, ku por ser mira komo forma di taksi moderno, aki na Kòrsou.
Uber ta un aplikashon (app) merikano, pa kual un usuario por regla transporte di un punta pa otro. Tur hende ku ta kumpli ku sierto rekisito por afiliá nan mes na Uber i transportá e usuario, segun esaki su petishon. Diferente pais manera, Merka, Hulanda, Mexico a introdusí e sistema di Uber. Na Kòrsou, Gobièrnu NO a tuma e desishon pa introdusí e sistema di Uber.
E desaroyo aki ta afektá e sektor di taksista i lo tin un efekto devastador riba entrada di e taxista. Di parti di Gobièrnu no tin ningun desishon ni maneho pa kambia e sistema di pèrmit eksistente.
Minister su pensamentu ta, ku tin diferente desaroyo teknológiko riba nivel mundial ku tin influensia riba sektornan manera turismo, telekomunikashon i transporte. Echo ta ku esakinan tiki tiki lo trata na hasi entrada serka nos tambe aki na Kòrsou. Ehèmpelnan ta Whatsapp i Airbnb. Pues Kòrsou i tur ku ta funshoná den e respektivo sektornan tin ku sòru di kana dilanti i krea métodonan kaminda nan ta protehá i òf adaptá nan mes na e tipo di desaroyonan aki.
Por lo tanto no tin ningun desishon di parti di gobièrnu pa introdusi Uber.
