Ministerio di Enseñansa ta tene webinar huntu ku tur dosente - Informashon tokante Gobièrnu di Kòrsou Bo opinion

Notisia

Ministerio di Enseñansa ta tene webinar huntu ku tur dosente

Geplaatst op 19 October 2021 dor di Ministerio Enseñansa, Siensia, Kultura & Deporte

Seshon informativo di Digitalisashon di Enseñansa.

WILLEMSTAD – Den kuadro di duna informashon tokante e trayekto di digitalisashon di enseñansa, Ministerio di Enseñansa, Siensia, Kultura i Deporte (ESKD) huntu ku vários ‘stakeholder’ a tene un webinar informativo i interaktivo pa informá tur maestro i dosente di e trayekto. E aktividat a tuma lugá di forma virtual riba 14 di òktober 2021 for di 3’or di mèrdia den forma di un selebrashon di dia di dosente.

Apertura di e webinar a keda hasí pa Minister di ESKD sr. Sithree ‘Cey’ van Heydoorn.  E organisashon di Sektor di Enseñansa i Siensia huntu ku tur e ‘stakeholders’ nan di e trayekto di digitalisashon a kombersá i dialogá ku e dosentenan. E webinar a tuma lugá den un sala virtual i den e aplikashon di Microsoft Office 365. Tur e partisipantenan a registrá i asina haña un link pa por partisipá aktivamente den e webinar. Orador di órden den esaki tabata sra. Rayla Pikeri kende a kaba di gradua resientemente (Post Master online teaching at Walden University) den e ramo kaminda e enfoke ta pa duna lès di forma virtual den e era moderno. E webinar a keda bon bishitá pasó mas ku 250 dosente a partisipá aktivamente na esaki. A risibí mas ku 100 pregunta di e oudiensia kaminda ku e seshon di pregunta a keda posponé i lo bai kontestá e preguntanan den un grupo ku ta bai lanta riba e plataforma soshal di Facebook di Ministerio di ESKD.

Kada ”stakeholder’ manera EY, Digicel, BTP, Inova/NetPro i Dataplanet tambe a partisipá aktivamente den e webinar akí den forma di video interaktivo i tambe ‘live’ den e sala virtual. E seshon akí ta e promé di un seri di seshon informativo ku e ministerio di ESKD ta bai tene pa splika henter e sektor di enseñansa i komunidat di e trayekto di digitalisahon di enseñansa.

Durante di e periodo ku ta sigui ta bai tene mas seshon informativo kaminda ta splika i dialogá ku muchanan, hubentut i komunidat kompletu. Sigui e desaroyonan akí riba e página sosial di Minister Sithree ‘Cey’ van Heydoorn, Ministerie van Onderwijs, Wetenschap, Cultuur en Sport i bira miembro di e grupo riba Facebook Digitalisashon di Enseñansa. 

—-

**Riba e foto- i videonan athunto por tuma nota di e webinar. Keda pendiente di e página di facebook di Ministerio di ESKD pa publikashon di e webinar i mas informashon relashoná ku e tópiko di digitalisashon di Enseñansa.

Ministerio konserní