Publiká riba 24 Òktober 2021
WILLEMSTAD – Ministerio di Enseñansa, Siensia, Kultura i Deporte (ESKD) ta stimulá pueblo di Kòrsou pa ban sigui traha riba un kultura di bienestar dor di sigui “Konop’é, Als’é i Traspas’é”. Esaki ta nifiká pa huntu nos ban hasi uso di tur lokual tin na sabiduria di nos grandinan tokante di bienestar. Konsekuentemente, Minister di Enseñansa, Siensia, Kultura i Deporte sr. Sithree ‘Cey’ van Heydoorn – na nòmber di Gobièrnu di Kòrsou – ta duna homenahe na un gran baluarte, aktris i kantante; un eminensia kultural ku ta sra. Rina M.E. Penso.
Dia 7 di òktober 2021, Minister Van Heydoorn a bai bishitá sra. Penso na su kas i a inform’é ku ta e intenshon pa dediká e periodo di 18 te ku 26 di òktober 2021 na su persona. Durante di e periodo akí lo bai tin diferente aktividat i informashon na skolnan, den media i den bario, pa prinsipalmente nos hóbennan sera konosí ku sra. Rina Penso i su aktividatnan den e mundu di teatro. Lo klousurá e periodo ku un gran homenahe na sra. Penso riba 26 di òktober, kual ta e dia ku ta selebrá su kumpleaño. Dia 22 di òktober último, Minister van Heydoorn a duna un ‘Award’ di rekonosementu na sra. Penso, nos baluarte, pa tur su obranan artístiko kultural ku a keda presentá for di aña 1960. Esaki a sosodé den The Movies na Otrabanda kaminda a presentá e obra “La Dama Blanca” ku a gana premio internashonal di filmashon di Karibe durante Fesitval ‘Tales’.
Sra. Hester Jonkhout (produktor/direktor/editor) ku a gana e premio di ‘Cinematography Award 2021’ na Festival Internashonal ‘Tales’ na Karibe ku e pelíkula “La Dama Blanca” (2021), a keda rekonosé pa su gran trabou. Sra. Laura Quast (eskritor/outor) i sr. Guus de Sain (outor/regisor) tambe a keda rekonosé pa nan trabou eksepshonal ku e obra “La Dama Blanca”.
Gobièrnu ta haña importante pa nos sigui konektá ku nos baluartenan i halsa nan eksperiensianan riba diferente nivel di arte i kultura, di moda ku nos por sigui traspasá esakinan pa nos generashonnan ku ta bini. P’esei mester sigui duna publisidat i rekonosementu na nos mes hendenan ku ta ehèmpel pa nos hubentut. Gobièrnu di Kòrsou ta sumamente orguyoso i ta rekonosé e gran balor di e dokumental “La Dama Blanca” ku ta muestra di un parti di nos historia artístiko kultural.
Un danki di kurason na sra. Rina Penso i otro produktornan pa nan aporte i kontribushon balioso na nos historia a traves di drama i aktuashon, ku ta keda pa semper komo un regalo na nos komunidat i futuro generashonnan.
Pabien Kòrsou, bo ta grandi i riku den historia i nos Rina Penso ta forma parti integral den esaki!
—
**Riba e fotonan athunto por tuma nota di e momentu ku Minister Sithree ‘Cey’ van Heydoorn a duna rekonosementu na sra. Rina Penso, Sra. Laura Quast, Sr. Guus de Sain i sra. Hester Jonckhout. Pa mas potrèt por bishita e facebook di Ministerio: Homenahe na La Dama Blanca/Rina Penso
____________________________________________________________________________
Informashon Relevante di sra. Rina Penso
Sra. Rina ta nasé na Kòrsou dia 26 di òktober (1927), di tata i mama yu di Kòrsou. Despues di a kaba su Mulo na St. Martinus Gesticht e a traha komo amtenar na ofisina di registro sivil. Su último 10 añanan na registro sivil sra. Rina Penso tabata enkargá tambe ku guia di seremonia di kasamentu (voltrekken van huwelijken) te dia e la baha ku penshun na aña 1987.
Bida Artistiko i Teatro
– Na aña 1960 sra. Rina a kuminsá presentá den obranan teatral;
– E ta ko-fundador di grupo di komedia Thalia;
– E a presentá tantu na Kòrsou, sobrá islanan BES, Aruba, Hulanda i Venezuela na vários okashon;
– Obranan konosí manera “Laiza porko Sushi, Bai bini bon mi Amor, Maribel, Despensa number robes;
– Mente a kue hala, Antigone, Penshonado kiko mas, esakinan ta pa menshoná algun.
Tradukshon
Sra. Rina a realisá diferente tradukshon di diferente obra. E.o. E tres monólogonan di Medea, Jopito, Ki karu e suku i Un kayente un friu.Sra. Rina Penso tin un trayektoria largu komo aktris. Dia 26 òktober próksimo sra Sra Rina Penso lo kumplí 94 aña. Durante su karera sra. Rina Penso a gana hopi premio tantu na Kòrsou komo internashonal. Sra Rina a risibí entre otro e siguiente premiashonnan.
Premionan optení komo “Mihó aktris”:
– 1969 Festival di Teatro na Kòrsou
– 1971 Daily Journal Drama Festival na Caracas
– 1976 Aruba International Drama Festival
Kondekorashon:
– 1972: Kondekorá ku “Medaya di Oro di Oranje Nassau”
– 1982: Honrá ku “Premio Cola Debrot”
– 2007: a risibi Premio Grotini
– 2012: Kondekorá komo “Ridder in de Orde van Oranje Nassau”
Sra. Rina a partisipá den diferente pelíkula hopi konosí i renombrá manera e.o. Famia Kibrá; Boka Saratonio; Almacita di Desolato; Ava i Gabriel, i último aki “La Dama Blanca. Tambe e tabata e aktris prinsipal den e pelíkula kòrtiku titulá “ La Dama Blanca” ku a gana un Premio resientemente pa Sinematográfiko na Caribbean Tales International Film Festival 2021. Tambe e a aktua den novelanan na radio i televishon.
Riba tereno di Kanto
Di mucha sra. Rina tabata gusta kanta i p’esei mes e tabata den Kor for di skol ku na algun okashon a yega di presentá na algun okashon na Radio Curom i un biaha tambe den Teatro Roxy bou di direkshon di Marie Sprockel. Tambe e a presentá den otro Kornan manera Orfeon Crescendo; kor di Coromoto, kor di Frank Davelaar, Kor di Vivienne Frans & Co. i Kor The Voices di Boy Wout. Komo solista sra. Rina a yega di presentá den show na Telecuracao e.o. “Show di Globo”, hotelnan i Sentro Pro Arte. Tambe ela partisipá den musical “it’s a small world”.
*****************
