Publiká riba 08 Sèptèmber 2024
Willemstad – Minister Sithree van Heydoorn a tuma nota di e situashon ku a presentá relashoná ku landamentu i edukashon físiko na skol i dia 26 di ougùstùs den un programa radial Minister a pidi espasio pa e por solushoná e problema aki.
Djaweps 29 di ougùstùs Ministerio di Enseñansa, Siensia, Kultura i Deporte (ESKD) a sinta na mesa ku direktor i tim di maneho di Fundashon Desaroyo Deportivo Kòrsou (FDDK) pa elaborá riba e retonan ku FDDK tin aktualmente den ehekushon di programa di landamentu i edukashon físiko bou di ora di skol pa studiantenan.
Durante e reunion akí a yega na palabrashonnan klave pa asina garantisá kontinuidat di landamentu i edukashon físiko bou di ora di skol.
Ministerio di ESKD i FDDK a yega na palabrashon ku lo reanudá e programanan di landamentu i edukashon físiko bou di ora di skol pa mas tarda dia 23 di sèptèmber próksimo.
Ku e apertura aki Minister Sithree van Heydoorn kier informá na komunidat ku e problema ta solushoná i ku gobièrnu di Kòrsou pa medio di su Sektor di Kultura i Deporte i FDDK ta garantisá kontinuidat di e proyekto na bienestar di nos muchanan.
