Bo opinion

Notisia

Ministerio di GMN ta felisitá Kòrsou ku su hospital nobo

Geplaatst op 21 November 2019 dor di Ministerio Salubridat Públiko, Medio Ambiente i Naturalesa

Willemstad – Dia 15 di novèmber 2019 a bira un fecha históriko pa Kòrsou ku apertura di Curaçao Medical Center ku alabes a habri un era nobo den kuido aki na Kòrsou. Hopi ta e rekuerdonan ku nos tur tin di Sint Elisabeth Hospital atraves di su 164 aña di eksistensha. Hopi tabata e trabounan ku a keda hasí e último 6 añanan aki i prinsipalmente e retonan ku mester a surpasá pa logra e resultado ku nos tur por mira awe i ku nos tur por ta orguyoso di dje.

Inspektor General prof. dr. Sirving Keli a duna lus bèrdè pa djabièrnè dia 15 di novèmber kuminsá ku e proseso di mudansa di Sint Elisabeth Hospital pa Curaçao Medical Center. Un proseso mas kompliká ku hopi di nos ta pensa kual ta keda dirigí pa ekspertonan ku tin hopi eksperensha ku mudansa di hospitalnan na Hulanda. Atraves di un slùrf a traspasá tur pashènt di forma kuidadoso i segun un “draaiboek” estrikto pa Curaçao Medical Center. Inspekshon di Salú tabata presente i a monitoriá e proseso pa garantisá ku tur kos ta kana segun plan.

Kuido hospitalario ta di sumo importansha den tur komunidat. Ku realisashon di nos hospital nobo lo mehorá e kuido hospitalario aki konsiderablemente kual lo benefisiá nos sektor di kuido den su totalidat. Ministerio di Salú, Medio Ambiente i Naturalesa ta gradisí tambe tur persona i organisashon ku a kontribuí na realisashon di e mega proyekto aki. Próksimo dianan via tur plataforma di komunikashon, lo sigui informá komunidat di tur desaroyonan ku ta tumando lugá na Sint Elisabeth Hospital i Curaçao Medical Center.

Ministerio konserní