Publiká riba 15 Òktober 2021
WILLEMSTAD – Ministerio di Salubridat, Medio Ambiente i Naturalesa (Ministerio GMN) ta partisipá na tur doño di negoshi i empresarionan ku tin un Pèrmit di Molèster (e asina yamá Hindervergunning), ku ministerio a inisiá un trayekto di kobransa di leges pa e pèrmit akí.
Ta trata aki di pagonan atrasá di leges di e último 5 añanan, pa kual lo bai kobra esnan ku no a kumpli ku e pago akí. E suma di leges pa Pèrmit di Molèster ta NAfl. 200,- pa aña. Por paga e suma na banko MCB riba number di kuenta 33168007, na nòmber di: Land Cur. UO Milieu en Natuur Beheer. Kòrda warda e komprobante di pago.
Tur aktividat komersial ta rekerí un Pèrmit di Molèster konforme e Ordenansa di Molèster (Hinderverordening). Despues di atkerí e Pèrmit di Molèster, mester kumpli ku pago anual di leges di NAfl. 200,- konforme Art. 19 di e Ordenansa Leges, Derechi di Prekario i Retribushon Kòrsou 1992, (A.B. 1992 no. 20). Personanan ku ta ehersé un aktividat komersial i no ta disponé di un Pèrmit di Molèster, por pasa na Ministerio di GMN na Roodeweg 49 pa hasi un petishon ofisial. Ta di sumo importansha pa disponé di e Pèrmit di Molèster den kaso ku risibí kontrol di e tim multidisiplinario.