Publiká riba 29 Yüli 2019
Willemstad – Ministerio di Gobernashon, Planifikashon i Servisio Públiko (GPS) a tuma nota di un informe ku ta sirkulá via di medionan sosial tokante supuesto empleadonan di Kranshi ku lo ta hasi bishita na kas relashoná ku chekeo di sedula relashoná ku próksimo elekshon. Ministerio di GPS ta informá komunidat ku ningun instansia di Gobiernu ta hasiendo tal chekeo. A chèk ku polis tambe i ta resultá ku no tin denunsia hasí di parti di suidadanonan ku a bira víktima di supuesto empleadonan di Kranshi.
Ministerio di GPS a tuma nota ku tin tambe un mensahe ta sirkulá riba retnan sosial ku ta diskribí un situashon similar ku lo (t)a pasa na Estados Únido di Merka. Na Merka aparentemente tin personan ta presentá na kas di suidadanonan ku karta di ‘Departement of Home Affairs’ pa kontrolá si suidadanonan tin traheta di indentifikashon bálido pa por vota, pero ku en realidat ta trata di ladronanan ku ta usa un triki pa por drenta kas di hende pa atraká nan. E informe tokante Kranshi ariba referí n’e na un tradukshon di esun di Merka, anto a hinka nòmber di Kranshi aden. Ta trata pues, pa loke ta trata Kòrsou di un asina yamá ‘fake news’.
Ministerio di GPS ta informá ku, dado kaso un suidadano risibí bishita di un persona ku identifiká su mes komo empleado di Kranshi, anto ku por yama telefòn 434-1600 òf 434-1642, pa verifiká ku ta trata di un personan ku ta hasi trabou pa Kranshi.
——————————————— xxx X xxx ———————————————-
Persona di kontakto:
Kesha Camelia, MBA
Beleidsmedewerker
T: +(599 9) 839-2467 M: +(599 9) 527-5635
E: kesha.camelia@gobiernu.cw
