Publiká riba 20 Yüli 2026
Special pa hóbennan ku kier un karera den Polis, Bombero òf SDKK
WILLEMSTAD – Ministerio di Hustisia ta lansa ofisialmente e promé edishon di Bootcamp di Hustisia, un programa intensivo di kuater dia, spesialmente diseñá pa hóbennan entre 18 te ku 35 aña ku tin interes pa sigui un karera den e sektor di Hustisia. E bootcamp lo tuma lugá for di 10 te ku 13 di ougùstùs 2026 i ta brinda un oportunidat úniko pa eksperensiá di serka kiko ta nifiká di ta un polis, un bombero òf un agente di seguridat den Sentro di Detenshon i Korekshon Kòrsou (SDKK).
Ku e bootcamp aki, Ministerio di Hustisia kier duna hóbennan un imágen realístiko di e profeshonnan den Hustisia. Hopi biaha hóbennan tin un idea general di e trabou, pero no konosé e responsabilidatnan, e desafio i e dedikashon ku e profeshonnan aki ta pidi. Pa e motibu ei, durante kuater dia, e partisipantenan lo haña un eksperensia práktiko, huntu ku profeshonalnan ku diariamente ta sirbi nos komunidat.
Durante e programa, e hóbennan lo eksperensiá di serka e bida di un polis. Nan lo bai patruyá, opservá kon polisnan ta traha riba kaya, mira kon nan ta atendé diferente situashonnan i lo partisipá den simulashonnan relashoná ku kriminalidat i mantenshon di órden públiko. Esaki lo duna nan un mihó komprondementu di e responsabilidat grandi ku ta bin pa ser un agente polisial den nos komunidat.
Di e mesun forma aki, partisipantenan lo konosé e mundu di e bomberonan tambe. Nan lo eksperensiá algun di e tareanan ku un bombero mester dominá, manera paga kandela, baha ku kabuya i otro ehersisionan físiko i tékniko ku ta forma parti di e entrenamentu diario. E programa ta mustra no solamente e parti físiko di e profeshon, sino tambe e importansia di traha den ekipo, disipliná i keda kalmu bou di preshon.
Ademas, e hóbennan lo risibí un introdukshon den e trabou di un agente di seguridat den SDKK. Nan lo siña tokante e papel importante ku personal di seguridat ta hunga den mantené seguridat, órden i stabilidat den e institushon korekshonal. Esaki ta duna un bista amplio di otro karera importante den e sektor di Hustisia.
Ministerio di Hustisia ta spera ku e eksperensianan aki lo inspirá mas hóben pa skohe un futuro den un di e profeshonnan aki. E pais tin mester di hóben motivá, disipliná i komprometé ku kier kontribuí na seguridat di Kòrsou. E bootcamp ta un forma inovador pa pone e hóbennan den kontakto direktamente ku e realidat di e trabou i pa laga nan eksperensiá, promé ku nan hasi e desishon di apliká pa un funshon.
Un total di 100 hóben lo haña e oportunidat aki. Solamente e promé 100 persona ku ta kumpli ku e kondishonnan di partisipashon i ku ta kualifiká lo por tuma parti na e bootcamp.
Partisipashon ta grátis. Ministerio di Hustisia kier kita tur opstákulo pa hóbennan ku tin interes pa konosé e profeshonnan aki. Tur partisipantenan lo risibí un T-shirt ofisial ku nan lo usa durante e bootcamp.
Inskripshon ta posibel via www.traboudenhustisia.com/un-snechi-di-hustisia. Pa inskripshon e hóben mester ta hulandes i e mester ta dispone di un ID bálido. Tambe e hóben lo mester graba un video di máksimo 60 sekònde na unda e ta indiká dikon e lo ta un bon kandidato pa partisipá na e bootcamp “Un Snechi di Hustisia”. Despues ku un persona a registrá, e lo risibí, den 48 ora, un konfirmashon indikando si e la kualifiká pa partisipá na e bootcamp.
Promé ku e bootcamp kuminsá, lo tin un anochi di informashon pa tur e hóbennan ku a kualifiká. Durante e anochi aki, partisipantenan lo haña tur informashon nesesario tokante e programa, e aktividatnan, loke nan mester trese i kon nan por prepará nan mes pa e kuater dianan di entrenamentu.
Ministerio di Hustisia ta hasi un yamada na tur hóben entre 18 te ku 35 aña ku tin interes den un karera ku ta hasi diferensia pa no laga e oportunidat aki pasa. Inskribí awe mes na www.traboudenhustisia.com/un-snechi-di-hustisia pasobra e promé 100 aspirante ku kualifiká lo haña un lugá den e Bootcamp di Hustisia.
[FIN DI KOMUNIKADO]
