Bo opinion

Notisia

Ministerio di Hustisia ta lansa kampaña, “Sendé?! Gosa … sigur”!

Geplaatst op 29 January 2020 dor di Ministerio Hustisia

Sint Ignatius College tabata esenario pa lansamentu di e kampaña Sendé?! Gosa…Sigur! djamars, 28 di yanüari 2020. Un kampaña organisá dor di Ministerio di Hustisia, spesial dirigí riba hóbennan di entre 12-24 aña ku e meta pa konsientisá riba e temanan droga, alkohòl i seksualidat.

E kampaña Sendé?! Gosa…Sigur! ta un koperashon entre diferente organisashon manera Ministerio di Hustisia, Ministerio Públiko i Kuerpo Polisial Kòrsou (KPC). Huntu ku e tim di Hustisia, lo tei tambe e programa Biba Amor di GGD. Pues, Ministerio di Salú, Medio Ambiente i Naturalesa tambe ta kolaborá ku e kampaña Sendé?! Gosa…Sigur!

Medio sosial, skolnan, marcha di Teener

E kampaña ku tin komo meta pa di forma konhunto, influensiá hóbennan di tal forma ku krímen bou di hóben ta baha, ta konsistí di tres trayekto. Di un banda lo kuminsá denter di poko ku un kampaña di konsientisashon riba medionan sosial. Aki lo hasi uso di entre otro video i otro tipo di material di komunikashon pa papia ku hóbennan riba e temanan di e kampaña i habri espasio pa hóbennan tambe pensa i dialogá riba uso di droga i alkohòl i sèks iresponsabel. Un i tur por sigui e kampaña aki riba e página di Facebook di entre otro Ministerio di Hustisia, Prevenshon Seguridat i Abo i páginanan di e organisashonnan ku ta forma parti di e tim. Huntu ku e kampaña riba medionan sosial, un tim konsistiendo di e organisashonnan ariba menshoná lo drenta skolnan sekundario – ku hóbennan den e grupo di enfoke ta bishitá – i duna informashon i guia na hóbennan. E tim aki lo kombersá ku e hóbennan riba e temanan en kuestion, durante seshonnan di 45 minüt di un forma fásil i simpel, sin imponé pero ku enfoke riba mustra e konsekuensianan di kada akshon. E charlanan den skol lo dura te ku 20 di febrüari 2020, un dia promé ku marcha di Teener. Durante di marcha di Teener tambe e tim di e kampaña lo tei pa parti diferente itemnan di promoshon pa e hóbennan presente. Por ehèmpel, lo repartí bòternan ku por uza pa bebe aden. E bòternan aki ta será ku tapa pa enfatisá riba tiramentu di droga den bebida. Un tópiko ku tambe ta bin dilanti durante e charlanan.

Duna informashon i konsientisashon

Durante di e seshonnan den skolnan lo bai mas amplio riba temanan manera uso di alkohòl bou di menornan i benta di alkohòl ku menornan, uso ilegal i iresponsabel di alkohòl i droga, tiramentu di droga den bebida, kombinashon di alkohòl ku por hiba na konsekuensianan fatal, rèspèt pa kurpa di otro i e límitenan ku un persona pone pa ku seksualidat, preshon di grupo i e importansia di mèldu i hasi denunsia ora un persona ta víktima òf testigu di un akto kontra lei. Ounke e foko di e kampaña ta riba hóbennan, tambe lo pone atenshon na e echo ku mayornan i komersiantenan ta ofresé òf bende alkohòl na menor di edat. Den e tim ku ta bishitá skolnan tin profeshonalnan ku hopi aña di eksperensia den duna informashon i guia na tur tipo di hóben riba temanan aki.

Skolnan

Den e eskoho di skolnan sekundario a enfoká riba skolnan AGO, VSBO, SBO i HAVO/VWO. Ayera, dia 28 di yanüari 2020 a kuminsá ku Sint Ignatius College den kual a duna charla na 150 alumno den diferente seshon. Awe, a toka turno na Maria Immaculata Lyceum, kaminda minister tambe tabat’ei presente durante e promé charla pa asina duna sosten na e kampaña. Na total e aña aki, e tim di charlanan lo bishitá binti skolnan sekundario.

”Sendé? Gosa … sigur!”

E kampaña di konsientisashon, ta karga e título Sendé? Gosa … sigur!. E ’slogan’ aki ta pa enfatisá ku maske e hóben ta kla pa disfrutá e ambiente karnavalesko, e ta hasi eskohonan ku no tin konsekuensianan negativo p’e. E no ta keda sin gosa, pero e ta gosa ’safe’, ku lo ménos riesgo posibel. Porsierto Ministerio di Hustisia, ta lansa e kampaña aki den temporada di Karnaval, komo ku ta un temporada di hopi fiesta i aktividatnan públiko na kua hóbennan ta partisipá pero e intenshon tei pa sigui ku e kampaña durante di aña 2020.

 

Sende?!

Ministerio konserní