Ministerio di Hustisia ta trese adaptashonnan temporal na reglanan di estadia den kuadro di COVID-19 - Informashon tokante Gobièrnu di Kòrsou Bo opinion

Notisia

Ministerio di Hustisia ta trese adaptashonnan temporal na reglanan di estadia den kuadro di COVID-19

Geplaatst op 23 April 2020 dor di Ministerio Hustisia

Willemstad – En bista di e diferente medidanan tumá rònt mundu pa e pandemia COVID-19, Servisio di Atmishon no por duna servisio manera kustumber. Konsekuentemente residentenan ku ta permanesé na Kòrsou ku un pèrmit di estadia, tambe ta kore riesgo ku nan permit di estadia a kaduká of ta bai kaduká. Mirando e situashon aki, Minister di Hustisia a alarga e temporada ku por renobá pèrmit. 

Por lo general, residentenan tin 3 luna di tempu despues ku nan pèrmit di estadia kaduká, pa alargá esaki sin konsekuensha pa nan derecho di residensia durante un periodo di toleransia (esaki no ta konta pa reglanan di naturalisashon). For di 13 di mart 2020 ta ekstendé e periodo di toleransia aki ku 3 luna. E ta konta pues pa personanan ku nan periodo di toleransia a kaduká durante e periodo di krisis aki. 

Por ehèmpel: e pèrmit di persona X a kaduká dia 13 di mart 2020, e persona aki tin un periodo di toleransia di 3 luna te dia 30 di yüni 2020, pero no por a pidi ekstenshon pa motibu ku e lokètnan no tabata asesibel pa públiko. E persona aki pues lo haña espasio te dia 30 di september 2020 pa entregá petishon pa ekstendé su pèrmit.

Turistanan pega na Korsou

Turistanan ku ta pegá na Kòrsou pa motibu ku vianan aereo di Kòrsou i sobrá di mundu a sera, mester hasi esfuerso pa mas tantu posibel yega nan destinashon via otro rutanan, momentu ku esaki bira posibel. Estadia legal di e grupo aki ta na punto di kaduká. Minister di Hustisia, mr. Quincy Girigori, a disidí ku por lo pronto lo tolerá e grupo di kua e estadia a kaduká den e temporada di krisis aki, riba nos isla.

Esaki ta konta pa turistanan ku riba 13 di mart 2020 tabata permanesé na nan residensia turístiko, di forma legal, i ku na e momentunan aki ainda ta na Kòrsou, sin posibilidat pa por regresá nan pais. Manera e posibilidat presentá i retirá e situashon di krisis, e turistanan aki mester regresá nan pais òf un destinashon alternativo, kaminda bou di sirkunstanshanan normal lo no risibí niun prohibishon di ingreso.  

Ministerio konserní