Publiká riba 25 Mart 2020
WILLEMSTAD – Departamentunan di Ministerio di Enseñansa, en partikular Sentro pa Èksamen i Ekspertisio, Inspekshon di Enseñansa i tambe Sektor di Enseñansa i Siensia, ta den estrecho kolaborashon ku partnernan den sektor di enseñansa pa yega na un planifikashon pa
apertura responsabel di skolnan i un proseso pa èksamen final. Djamars 24 mart 2020 a drenta konfirmashon ku Hulanda a disidí di para nan èksamen sentral. Komo ku nos sistema di enseñansa ta mará na esun di Hulanda, esaki sin mas lo tin impakto riba nos studiantenan na Kòrsou tambe. Ta inevitabel ku lo mester harmonisá den sierto aspektonan, pa garantisá ku studiantenan na Kòrsou por tin konekshon ku enseñansa superior. Ministerio di Enseñansa, Kultura, Siensia i Deporta aki na Kòrsou ya tin kontakto ku Ministerio di Enseñansa (OCW) na Hulanda pa yega na un kordinashon strukturá na benefisio di nos studiantenan.
E planifikashon pa kontinuashon di enseñansa na Kòrsou lo inkluí proposishonnan pa ku lèsnan ku mester kompleta, posibilidatnan pa hasi prueba òf eksamen, finalisá stazje i tambe konekshon ku enseñansa superior. Esaki teniendo kuenta ku e posibel desaroyonan di e
Coronavírùs na Kòrsou. Den e próksimo dianan lo sigui konsultá ku entre otro direktivanan, sindikato i funshonarionan di Ministerio di Enseñansa pa konkretisá tur proposishon i presentá esaki promé ku fin di siman.
