Publiká riba 19 Ougùstùs 2020
Willemstad – Ministerio di Desaroyo Sosial, Labor & Bienestar (SOAW) a transferí e promé parti di e montante pa klientenan ku ta bini na remarke pa sèn pa paña di skol pa mucha (kledinggeld).
Ta asina ku un grupo di kliente ku ta konsistí di 828 mayor a risibí e kompensashon djamars dia 18 di ougùstùs 2020 pa kumpra paña pa skol (kledinggeld). Esaki ta representá 1369 mucha ku ta baiendo skol.
E siman aki SOAW lo hasi su máksimo esfuerso pa kaba di transferí e montantenan rekerí pa e sobrá klientenan ku mester risibí e kompensashon pa paña di skol. E último personanan ku lo risibí e kompensashon lo tin e montante rekerí riba nan kuenta djabièrnè awor dia 21 di ougùstùs 2020, despues di mèrdia.
SOAW ta pidi tur mayor pa hasi uso di e kompensashon di un forma responsabel i na benefisio di nan yunan ku ta bai skol.
