Ministerio SOAW ta lansa proyekto di investigashon, informashon i konsientisashon riba uso di awa i koriente - Informashon tokante Gobièrnu di Kòrsou Bo opinion

Notisia

Ministerio SOAW ta lansa proyekto di investigashon, informashon i konsientisashon riba uso di awa i koriente

Geplaatst op 31 May 2020 dor di Ministerio Desaroyo Sosial, Labor i Bienestar

WILLEMSTAD – Minister di Desaroyo Sosial, Labor i Bienestar Hensley Koeiman, djabièrnè 29 di mei 2020 a tene un reunion tokante un proyekto pa konsientisá pueblo en general, i hendenan ménos pudiente en partikular, kon pa baha gastu di awa i koriente. Esaki tambe pa uso na un manera mas duradero di energia ku bista riba futuro generashonnan i kuido di medio ambiente i mundu.  Na e reunion a partisipá: Odette van Brummen-Girigori di Universidat di Kòrsou, Richenel Bulbaai di Fakultat Tékniko di Universidat di Kòrsou, Saniel Theodora di Aqualectra i Mirieta Lourens-de Lanoy, di gabinete di Minister Koeiman.

A yega na e desishon ku lo forma riba término korto un grupo di trabou ku representantenan di Fundashon pa Konsumidó, Ministerio SOAW, Universidat di Kòrsou (UoC), Aqualectra i Fundashon Kas Popular (FKP). E grupo di trabou mester  presentá un rapòrt ku rekomendashonnan. Lo enbolbí alabes studiantenan di UoC ku lo haña un tarea di investigashon kon por alsa konosementu di e konsumidó di awa i koriente i duna informashon ku ta kondusí na kambio di aktitut i komportashon pa logra e resultado deseá. E konsientisashon ta dirigí riba entre otro: kon pa re-usa awa i kon pa usa awa i koriente mas efisiente. Pa usa ménos energia por usa por ehèmpel aparatonan ku ta usa ménos energia, por ehèmpel lampinan LED, aparatonan ‘inverter’ etc., pone e termostat di èrko entre 22 pa 24 grado Selsius, hasi uso di Pagatinu en bes di post-paid, minimalisá rayonan di solo riba muraya di kas, por ehèmpel ku palu di mata. Kuido di infrastruktura di pipanan di awa, evitá pipa ku ta lèk i flòter ku ta pega ta algun manera ku por baha desperdisio di awa.

Ku e proyekto e instansianan ariba menshoná ta kontribuí huntu pa traha na un komunidat konsiente ku uso di awa i koriente mester ta di un forma efikas i duradero.

Ministerio konserní