Ministernan di Desaroyo Ekonómiko (MEO) i di Desaroyo Sosial, Labor i Bienestar (SOAW) huntu ku CHATA a logra ku kursistanan di ‘Kla pa Turismo’ por sigui haña training - Informashon tokante Gobièrnu di Kòrsou Bo opinion

Notisia

Ministernan di Desaroyo Ekonómiko (MEO) i di Desaroyo Sosial, Labor i Bienestar (SOAW) huntu ku CHATA a logra ku kursistanan di ‘Kla pa Turismo’ por sigui haña training

Geplaatst op 04 May 2020 dor di Ministerio Desaroyo Ekonómiko

WILLEMSTAD – Ku e meta pa prepará trahadó pa e sektor di turismo pa por duna un mihó servisio na momentu ku de-eskalashon pa e sektor aki tuma lugá, ministernan di MEO i SOAW, den koperashon estrecho ku CHATA, lo kontinuá ku entrenamentu pa e partisipantenan di e proyekto ‘Kla pa turismo’ di forma adaptá.

Ta trata aki di un grupo di 46 kursista ku ya a finalisá e trayekto di preparashon teorétiko i ku a kuminsá laborá den un di diferente hotèlnan lokal promé ku Kòrsou a keda konfrontá ku e pandemia di COVID-19. E kursistanan aki a finalisá e parti teorétiko ku éksito den e disiplinanan; Asistente di Servisio (Bedieningsassistent), Asistente di Kushina (Keukenassistent) i Kamarera (Housekeeping).

Durante di un periodo di 3 luna lo profundisá i repasá e parti teorétiko ku e kursistanan aki i lo kombiná esaki ku parti di e aspekto práktiko. E parti teorétiko lo tuma lugá virtual hasiendo uso di teknologianan moderno manera Skype i Zoom. E parti práktiko lo keda teniendo kuenta ku tur protokòl i reglanan vigente den kuadro di distansia sosial i higiena relashoná ku COVID-19.

Mirando ku e kursistanan aki resientemente a drenta merkado laboral promé ku COVID-19, ministerio di SOAW lo sòru pa durante di un periodo di 3 luna  kada un risibí un sosten finansiero te na un máksimo di Naf 1000,- pa luna. E montante aki ta keda kondishoná na nan partisipashon aktivo na e programa di entrenamentu.

Ku e desishon aki Gobièrnu di Kòrsou den representashon di Minister di Desaroyo Sosial Labor i Bienestar, sr. Hensley Koeiman i tambe Minister di Desaroyo Ekonómiko, sra. Giselle Mc William, ta kontribuí na empoderashon di nos hóbennan ku a skohe pa un karera den e sektor Turístiko. Ku empoderashon di e kursistanan Gobièrnu di Kòrsou no solamente a alsa e posibilidatnan di trabou den e sektor di HORECA, pero tambe a logra ku di e forma aki por kontribuí na un mihó kalidat di servisio den e sektor di turismo i tambe logra prepará e hóbennan aki debidamente pa asina e sektor bira operashonal nan por sigui laborá den esaki ku tur e kapasidat nesesario i sigui duna un aporte na nos ekonomia i desaroyo di nos turismo.

Ministerio konserní