Publiká riba 20 Sèptèmber 2018
Willemstad – Komersio ku eksterior ta di sumo importansia pa Kòrsou. Ministerio di Desaroyo Ekonómiko(MEO), den su afan pa mobilisá komersio den servisionan entre Kòrsou i Repúblika Dominikana ta organisá un mishon komersial pa Repúblika Dominikana dianan 24 te ku 27 di òktober próksimo. E mishon komersial aki lo keda predisí pa minister di Desaroyo Ekonómiko, sr Steven Martina.
Durante e último añanan MEO a bin ta traha duru pa establesé kontaktonan ekonómiko duradero i sólido ku paisnan den region i mas ku klaro ta traha duru pa por mantené i reforsá e lasonan aki kontinuamente.
Repúblika Dominikana a keda identifiká den e Akuerdo di Gobernashon 2017-2021 komo un di e paisnan di prioridat, siendo un ekonomia ku tabata tin un proyekshon pa kresementu di 4,5% den 2017 i ku hopi posibilidat pa importashon i eksportashon. Ademas, Kòrsou ta mantené lasonan históriko, sosial, kultural i komersial hopi estrecho ku e pais.
Dianan 24 pa 27 di òktober próksimo un delegashon lokal lo bolbe sali pa Repúblika Dominikana i gustosamente e ministerio ta deseá pa empresarionan lokal tambe forma parti di e delegashon aki. E foko durante e mishon komersial pa Repúblika Dominikana lo ta riba empresanan den tur sektor ku ta proveé servisio.
Durante e mishon komersial aki e delegashon lokal lo forma parti di e Konvenshon Anual ALES. ALES ta para pa The Latin American Association of Services Exporters i e ta un organisashon internashonal ku ta konsistí di 36 institushon públiko i priva prosedente di 17 diferente pais. ALES ta enfoká riba eksportashon di servisio i tin e ophetivo pa promové Latino Amérika komo un hub global pa optené servisio. Pa e motibu aki aktividatnan di ALES ta keda desaroyá pa promové mihó posishonamentu di e region karibense riba merkado internashonal, halsando e kalidat kompetitivo di paisnan partisipante i tratando na hasi esakinan mas atraktivo komo destinashonnan di invershon.
Kostonan pa por forma parti di e delegashon aki ta $150 (Fls. 273,-) pa kada kompania ku un máksimo di 2 representante pa kada kompania. Gastunan di biahe,konsumo i estadia ta pa kada persona/kompania individual. Pa partisipá por registrá te ku djaluna 31 di sèptèmber próksimo via https://www.surveymonkey.com/r/ALES-DR
E link pa registrashon lo ta disponibel tambe riba e página di Facebook di Ministerio di Desaroyo Ekonómiko. Pa mas informashon tokante e mishon aki por tuma kontakto ku representantenan di MEO (Sektor di Kooperashon Ekonómiko ku Eksterior):Señora Nzinga Waandels via nzinga.waandels@gobiernu.cw òf yamando 462 1444 ekstenshon 148. Tambe por tuma kontakto ku señor Saïd Hensen via said.hensen@gobiernu.cw òf yamando 462 1444 ekstenshon 194.
