Publiká riba 23 Aprel 2024
WILLEMSTAD – E molèster di huma ku habitantenan di sierto bario pariba di Kòrsou ta sinti, lamentablemente lo sigui durante e dianan benidero. E huma ta sali di un kandela di shushi bou di tera na Dam Pretu, kaminda pa años kaba hende iresponsabel ta tira shushi ilegal i despues ta tap’é ku tera. Kuerpo di bombero i otro organisashonnan di Gobièrnu, manera Obra Públiko, GMN i Servisio Meteorológiko, ta monitor e situashon. A koba un kanal, ku ta evitá ku e kandela ta yega na e palunan den besindario.
E huma a baha un tiki pero ainda e ta di un eskala ku por duna molèster. Segun informashon di Servisio Meteorológiko, e atmósfera no ta permití e huma subi bai haltu. Esaki ta nifiká ku e huma ta keda kologá abou, loke por okashoná ku hende ta sintié den nan kas. Ora tin mas bientu i atmósfera ta permití, e huma por meskla ku airu i asina e efekto lo ta mínimo. Mirando ku ta trata di un lugá kaminda ta tira shushi ilegal, por tin material peligroso ku por influensiá e huma.
Kuerpo di bombero, huntu ku Obra Públiko (OW), ta den deliberashon tokante un posíbel solushon pa por baha e huma mas tantu i mas lihé posibel. Basha awa riba e kandela ‘estilo fòrnu’ no ta duna solushon. Awa lo no baha e huma i pa motibu ku no por mira kiko ta bou di e tera ta hasi e situashon pa e bomberonan peligroso. E tera por sak den otro.
GMN a duna konseho na habitantenan den e barionan pariba, manera Kent u zelf, Montaña, Sta.Rosa i otro bario ku tin molèster di huma, pa tuma sierto prekoushon. Ta bon pa sera bentana mas tantu ku ta posibel i si tin hende ku tin problema ku pulmon, ta konsehá pa laga e persona keda un otro kaminda, te ora e situashon neutralisá. Outoridatnan ta lamentá e situashon, pero ta sigurá ku ta hasi tur loke ta den nan poder pa por aliviá e situashon mas pronto posibel.
