Publiká riba 28 Novèmber 2022
Willemstad – 887 mucha di skol di fundeshi i skol speshal di fundeshi ta risibí un eskurshon den Kura Hulanda den kuadro di Willemstad 25 aña komo patrimonio mundial di UNESCO. Esaki durante henter e siman di selebrashon, esta di 28 di novèmber pa kulminá 4 di desèmber.
Minister Charles Cooper, huntu Minister di Enseñansa, Siensia, Kultura & Deporte, Sithree van Heydoorn, a hasi apertura di e siman di eskurshon den Kura Hulanda pa mucha di Skol di Fundeshi i Skol Speshal di Fundeshi di grupo 6, 7, i 8.
Ta importante pa pasa nos herensia kultural i konosementu di nos Patrimonio Mundial pa nos muchanan.
For di djaluna te ku djabièrnè durante oranan di mainta, un total di 21 skol ta risibí un rekorido den Kura Hulanda. Esaki ta kuminsá ku e museo di katibu, siguí pa e rikesa kultural di Afrika, i lo terminá ku un rekorido den e diferente monumentonan for di Kas di Katibu te ku Kas di Shon. Tambe lo tin splikashon di kon tabata spar awa den un ‘regenbak’.
Durante di e promé mainta, esta riba djaluna 28 di novèmber, tambe a hasi entrega di e buki digital ‘Kucho den kayanan di Otrabanda’ na Minister van Heydoorn. Lo pasa esaki den tur klas via di un asina yamá ‘digiboard’, kaminda tur mucha, na un manera kolorido, ta kana den kayanan di nos sentro di Siudat. Esaki ta un manera pa kuminsa eduká mucha di nos Patrimonio Mundial.
