For di aña 2019, ku tabata Aña di Kaha di Òrgel, a kuminsá ku un trayekto den Sentro di Detenshon i Korekshon Kòrsou (SDKK) kaminda a traha kaha di òrgel chikitu. Despues a kuminsá ku un proyekto kaminda a traha un kaha di òrgel pa SDKK. Durante e atardi a hasi desvelo di e kaha ku a traha na SDKK ku awor ta kla. Esaki ta mustra ku e herensia kultural ta sigui biba i huntu ku vários organisashon mas ta sigui traha na preservashon di nos kultura.
Tambe durante di e kurso un partisipante, sr. Anouck Noorden, kende ta un profeshonal den e área di IT, a pensa riba un sistema pa digitalisá un parti di loke el a siña durante e kurso, esta, markamentu di nota riba ka’i òrgel. Esaki a pone ku IBIS Management, ku ta doño di trabou di sr. Noorden, a yega na un akuerdo ku CCC pa sigui traha huntu riba un sistema di digitalisashon. P’esei e organisashonnan IBIS I CCC a firma un akuerdo (letter of intent) kaminda nan ta bai traha huntu riba e programa: “E KLABU,” un programa digitalisá pa marka nota di músika riba ka’i òrgel.
Despues a sigui ku un brindis na CCC kaminda por a gosa di e músika klásiko kultural di kaha di òrgel. Bishitantenan i vários organisashon mas a gosa den un ambiente ameno di nos herensia kultural musikal. Minister enkargá ku kultura, sr. Sithree van Heydoorn, a keda sumamente kontentu ku e aktividat i a la bes a mustra riba e echo ku modernisashon den kuadro di digitalisashon por sostené nos herensia kultural sin eleminá esaki.
—
KOMUNIKASHON
**Riba e potrètnan athunto por tuma nota di e aktividatnan na CCC. Pa mas potrèt bishitá: Músika riba kaha di òrgel
