Publiká riba 05 Yüni 2019
“Association of Caribbean University, Research and Institutional Libraries” (ACURIL) ta un organisashon Karibense di biblioteka fundá na 1969 ku base na Puerto Rico. E konferensia aki ta unu sumamente importante i ta dirigí riba e futuro di bibliotekanan, ku atenshon pa e desaroyonan den Karibe banda di e tendensianan mundial i universal. E mishon di ACURIL ta pa fasilitá desaroyo i uso di biblioteka , archivo, servisio di informashon i identifikashon, kolekshon i preservashon di fuentenan di informashon, sosteniendo hinter e area di Karibe. Alabes ACURIL ta determiná pa establesé un organisashon distinto i efektivo, konsistiendo di individuonan kalifiká riba tereno di archivo i e siensia bibliotekario, sosteniendo tur profeshonalnan i uniendo hinter e area di Karibe.
ACURIL ta sostené kolaborashon entre universidat i bibliotekanan ku ta dirigí riba investigashon. ACURIL ta kere den trahamentu estrecho entre bibliotekanan, inkluyendo bibliotekanan públiko i privá. ACURIL ta esenshal pa inspirashon profeshonal pa hopi bibliotekario den e region Karibense, brindando nan kontinuamente e oportunidat di krese, siña i sigui profeshonalisá nan mes dor di krea e oportunidat pa traha ku otro, wak kon otronan ta hasi e trabou di biblioteka i hasi uso di e mihó práktikanan.
E aña aki e konferensia ta dediká na tres direktora retirá di den Karibe: sra. Alice van Romondt di Aruba, sra. Blanca Hodge di Sint Maarten i sra. Rosemary de Paula di Kòrsou. Un danki inmenso ta bai pa nan dedikashon na e mundu bibliotekario.
Minister di Enseñansa, Siensia, Kultura & Deporte sra. Marilyn Alcalá-Wallé tambe a asistí na e enkuentro riba invitashon di ACURIL i a keda risibí dor di su kolega Minister, su ekselensia sr. Armando Lampe i direktora di Biblioteca Aruba sra. Astrid Britten.
#ACURIL #konferensia #Aruba #biblioteka #SDG’s
******************************************************************
