WILLEMSTAD – Ku profundo tristesa Gobièrnu di Kòrsou a tuma nota di e fayesimento di Su Ekselensia Dominico Felipe “Don” Martina, ex Promé Minister di Antia Hulandes, èks miembro di Parlamento di Antia Hulandes, èks Diputado di Finansa i Ekonomia pa teritorio insular di Kòrsou, èks miembro di Eilandsraad i desde 2023 Minister di Estado di Kòrsou.
Don Martina a desempeñá un papel krusial den e historia polítiko i atministrativo di Antia Hulandes. Su segundo mandato komo Promé Minister tabata karakterisá komo un periodo difísil, marká pa kontratiemponan ekonómiko despues di e salida di Aruba i kaida di ingresonan for di e industria petrolero.
Ku determinashon i vishon, el a fiha rumbo pa reformanan importante ku e meta pa fortalesé ekonomia i mehorá e kalidat di bida di nos pueblo. Su liderazgo den e tempunan di turbulensia a laga su marka i ta forma parti importante di e legado ku e ta laga atras.
Gobiérnu di Kòrsou ta ekspresá su mas sentido pésame na famia, amigu i sernan kerí di Don Martina i ta deseá nan hopi forsa den e momentunan difísil akí.
Na su honor tur edifisio di Gobièrnu lo tin bandera ‘halfstok’ te 6‘or di atardi riba e dia di su despedida.
Na nòmber di Promé Minister di Kòrsou,
Gilmar S. Pisas
