Notisia

Willemstad, 09.06.2026 – Den kuadro di “International Archives Week 2026’” ku e tema “Archives for Justice: Rights, Memory and Futures”, Archivo Nashonal di Kòrsou  awe – riba “International Archives Day” a lansa, ku un seremoniá ofisial, su e-depot nobo i wèpsait renobá. Ku e paso importante – riba e “International Archives Day” aki, Archivo Nashonal ta hasi un gran parti di e herensia dokumental di Kòrsou aksesibel digitalmente pa públiko, kaminda ku nan ta den mundu.

Archivonan ta hunga un ròl fundamental mundialmente den sostené hustisia, protehá derechonan, konservá memoria kolektivo i hasi transparensia i responsabilidat posibel. Archivonan ta dokumentá desishonnan, responsabilidatnan i historia, i asina nan ta kontribuí na hustisia hurídiko, sosial, kultural, histórico i intergenerashonal. Na mes momentu, archivonan tambe ta reflehá relashonnan di poder i historia kolonial, loke ta mustra ku praktiká di archivo inklusivo, partisipativo i étiko ta esensial.

E  e-depot i e wèpsait nobo ta relashoná ku otro. Via di e wèpsait renobá, e e-depot lo bira visibel i aksesibel pa públiko. E e-depot ta ofresé akseso na archivonan digitalisá i ta forma un paso importante den digitalisashon i demokratisashon di memoria nashional di Kòrsou.

Un di e promé archivonan ku lo bira disponibel den e e-depot ta e Archivo di “Hoofd Stembureau”. E archivo aki ya a wòrdu digitalisá pa mas o ménos 70%. Aktualmente ta trahando riba e prosedura yamá “ingest”: e transferensia tékniko i di kontenido di e archivonan digital pa e e-depot. E proseso kompleto aki ta wòrdu ehekutá aworaki pa partidonan spesialisá eksterno.

Loke ya ta kompletamente disponibel den e e-depot ta e Archivo di e ‘Districtmeesters’, tambe konosí komo e “Kolekshon Juliana-Brenneker”. E archivo aki ta e úniko archivo di plantashi na Kòrsou i ta representá un parti sumamente importante di historia di nos isla. Pa motibu di su balor históriko eksepshonal, UNESCO a rekonosé e kolekshon aki komo parti di su programa Memory of the World. Asina, e archivo no solamente tin balor pa Kòrsou, sino tambe pa henter humanidad.

Te poko tempu pasa, inspekshon públiko di e dokumentonan di archivo aki tabata kasi imposibel debí na e mal estado di e material di e dokumentonan. Danki na digitalisashon, e kolekshon úniko aki awor ta aksesibel 24 ora pa dia, 7 dia pa siman, pa investigadónan, studiantenan i interesadonan rondó di mundu. Esaki ta un di e gran bentahanan di e e-depot: preservashon i aksesibilidat ta bai man den man.

Ademas, Archivo Nashonal tin e ambishon pa den tres aña pone henter Archivo Kolonial — aproksimadamente 600 meter di material di archivo — disponibel digitalmente via di e e-depot. E desaroyo aki lo duna un gran impulso na investigashon históriko, konsenshi á públiko tokante nos pasado, formashon di identidat i ‘nation building’. Ademas, e material lo por sirbi pa propósito edukativo, tantu lokal komo internashonal.

Den futuro, e e-depot lo funshoná komo e destinashon final di tur archivonan digital generá pa gobièrnu. Asina, e lo forma un parti esensial di e programa mas amplio di e-government di gobièrnu. Pasobra e e-depot ta pone eksigensianan riba metadata i struktura di archivonan ku ta drenta aden. Alabes e lo kontribuí tambe na estandarisashon i mehorashon di e manehamentu maneho digital di informashon den gobièrnu.

Ku e lansamentu di e e-depot i e wèpsait nobo, Nationaal Archief Kòrsou ta duna un paso importante den direkshon di aksesibilidat digital duradero di e herensia nasional pa generashonnan aktual i di futuro.