Publiká riba 27 Novèmber 2017
WILLEMSTAD –Minister Jesus-Leito di Ministerio Tráfiko, Transporte i Planifikashon Urbano ta pidi atenshon di un i tur ku ta transportá òf ta ofresé transporte komersial (kontra pago) na pasaheronan sin ku nan ta disponé di pèrmit òf eksonerashon a base di e lei “Eilandsverordening personenvervoer” (A.B. 1969, no. 23).
Gobièrnu a tuma nota resientemente di kasonan kaminda hotèlnan (“resorts”), empresanan òf personanan ta ofresé pasaheronan transporte riba kareteranan públiko kontra pago direkto òf indirekto. E práktika aki ta kontra di nos lei di transporte di pasahero. Segun artíkulo 2 di e “Eilandsverordening personenvervoer” no por transportá persona riba base komersial, pues kontra pago, riba kareteranan públiko di Kòrsou sin un pèrmit òf eksonerashon di gobièrnu.
Tambe Gobièrnu a tuma nota di kasonan kaminda abogadonan lo a duna nan kliente konseho pa ofresé servisio di transporte numa paso esaki lo no ta kai bou di e “Eilandsverordening personenvervoer”. Pa aklará e parti aki, mester indiká ku den pasado tabata tin diferente kaso den korte kaminda wes a dikta ku ni maske e pasaheronan no ta ser kobra direktamente pa e kompania ku ta ofresé e servisio di transporte, indirektamente e pasahero ta paga pa e servisio di transporte.
Esaki ta tuma lugá por ehèmpel dor ku e hotèl ta paga e persona of kompania ku a transportá pasahero p’e, i e hotèl na su turno ta deskontá (‘reken door’) e gastunan aki den nan servisio i/òf produkto ku nan ta ofresé nan huéspet. Den un kaso asin’aki no ta hasi distinshon si esun ku ta ofresé e transporte mes ta doño di e vehíkulo, ni si e ta kumpra e servisio di otro hende.
Tin kòntròl mas rígido riba kumplimentu ku e “Eilandsverordening personenvervoer”, tantu pa esnan ku ta ofresé transporte ku pèrmit òf eksonerashon komo riba esnan ku ta ofresé transporte sin un pèrmit òf eksonerashon. Pues ta pidi tur persona òf kompania ku, na e momentonan aki, ta ofresé transporte pa pasahero sin ku nan ta disponé di un pèrmit òf eksonerashon, pa nan stòp ku e práktika aki mesora. Por hasi uso di tur persona òf kompania ku si ta disponé di un pèrmit pa ofresé servisio di transporte.
Esnan ku ta hasi nan mes kulpabel na esaki, lo por enfrentá enkarselashon.
Pèrmit di establesimentu pa un negoshi di transporte di pasahero no ta duna e kompania e derecho pa por transporta pasahero. Ta trata aki di dos lei distinto. I e persona ta deseá na risibí un pèrmit di establesimentu mester akudí na ‘Vergunningenloket’ na Euro Building den Saliña pa haña un pèrmit konforme e di dos lei.
Ta pidi pa tur persona ku tin duda pa lo ke ta trata e aplikashon di e lei, pa tuma kontakto ku Servisio di Tráfiko i Transporte na number di telefon 839-2133 òf via di e-mail info.vvrp@gobiernu.cw.
