NO TIN ABSOLUTAMENTE NADA IREGULAR RELASHONÁ KU KOLABORADONAN NA MINISTERIO DI SOAW - Informashon tokante Gobièrnu di Kòrsou Bo opinion

Notisia

NO TIN ABSOLUTAMENTE NADA IREGULAR RELASHONÁ KU KOLABORADONAN NA MINISTERIO DI SOAW

Geplaatst op 30 June 2019 dor di Ministerio Desaroyo Sosial, Labor i Bienestar

Willemstad – Mi ta konsiente di e echo ku nos ta biba den un periodo di tempu den kua ta parse ku a bira nòrmal ku ta publiká kosnan tendesioso i tin biaha te hasta inkorekto ku e meta opvio pa hasi daño na nòmber di otro. Pa e motibu ei mi ta skohe hopi biaha pa no reakshoná. Ami mi ta na pas ku mi konsenshi den tur desishon ku mi tuma i komo tal mi ta skohe pa ignorá hopi kos. Sinembargo den e kaso aki ta menshoná nòmber di hende ku no tin arte ni parte den e asuntu mi ta reakshoná pa klarifiká e asuntu. Esnan ku si ta den mi kabinete òf ta hasi un trabou pa mi konforme reglanan vigente tampoko ta meresé di lesa nan nòmber den medionan sosial.

Mi gabinete i hendenan ku ta traha huntu ku mi tur a keda apuntá konforme regla i proseduranan den Gobièrnu.

Mi gabinete ta konsistí di 5 kolaborador. Esaki konforme reglanan vigente for di nasementu di Kòrsou komo pais den Reino.

Konsiderando e rapòrt di Kontrolaria General di Kòrsou ku ta indiká ku gran mayoria di SOAW su personal ta mal ubiká i konsiderando e hecho ku tin masha hopi reklamo riba e servisio ku klientenan ta eksperensiá ora nan aserká SOAW pa ayudo òf asistensia ku tin komo konsekuensia ku SOAW ta disfunshonal, mi a konsiderá apropiá pa aserká algun persona pa yuda‘mi atendé ku e situashon aki.

Dos area riba kua mi mester di yudansa ta esun di asistensia hurídiko i esun di asistensia riba asuntunan di finansa. Ta trata di ekspertisio ku ta masha limitá den aparato públiko. Pa e motibu ei, konforme regla i proseduranan vigente, mi a atkerí un consultant huridiko i unu finansiero.

Mi konseheronan hurídiko i finansiero ta enkargá entre otro ku tareanan relashoná ku diferente trayekto, entre kua revishon di leinan laboral i sosial, implementashon di proyektonan di guia i formashon laboral, revishon i optimalisashon di e maneho finansiero di SOAW i tambe atendé ku e reto di tur e fundashonnan ku ta risibí supsidio serka gobièrnu.

Tambe tin dos ámtenar ku, konforme tur regla i prosedura ta na disposishon di mi komo minister. Ta trata di dos ámtenar ku tin hopi aña di eksperensia di trabou den e área spesífiko i kendenan naturalmente ta gosa di mi konfiansa.

Konkluyendo: Kada un di e personanan ku ta forma parti di mi gabinete òf ku ta asistí mi den mi trabou ta hasi esei konforme lei, konforme regla i konforme prosedura.

Hensley F. Koeiman
Minister di DSLB

Ministerio konserní